ڕێبوار تاڵەبانی: ئەوەی بەعس بە 35 ساڵ لە کەرکووک نەیکرد ڕاکان جبووری بە ساڵێک کردی

رێبوار تاڵه‌بانی له‌گه‌ڵ لیژنه‌ی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم له‌ په‌رله‌مان كۆبووه‌وه‌

لیژنه‌ی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم له‌ په‌رله‌مانی كوردستان بانگهێشتی رێبوار تاڵه‌بانی سه‌رۆكی ئه‌نجوومه‌نی پارێزگای كه‌ركووكی كرد و ئەمڕۆش ڕێبوار تاڵەبانی، گه‌یشته‌ په‌رله‌مانی كوردستان و له‌گه‌ڵ لیژنه‌ى ناوچه‌ كوردستانییه‌كانى ده‌ره‌وه‌ى ئیداره‌ى هه‌رێم کۆبووەوە . 

دواتر له‌ لێدوانێك بۆ ده‌زگاكانی راگه‌یاندن جوان رۆژبه‌یانی سەرۆکی لێژنەی ناوچە کوردستانییەکان ڕایگەیاند: ڕێبوار تاڵەبانی کە سەرۆکی ئەنجوومەنی پارێزگای کەرکووک و خاوەن سەنگ و پێگەیەکی هەستیارە، بێگومان لەبارەی دۆخی کەرکووکەوە کۆمەڵێک زانیاریی گرنگی لایە بۆ ئەوەی بەرچاوڕوونی بداتە لێژنەکەمان، ئەمڕۆ لە کۆبوونەوەکەماندا لەبارەی چەند پێشنیارێکەوە گفتوگۆمان کرد و چەند زانیارییەکی گرنگی پێدان کە ئێمە بتوانین لە داهاتوودا وەک بەرنامەی کاریی لیژنەکەمان کاری لەسەر بکەین. 

هه‌روه‌ها ڕێبوار تاڵەبانیش رایگه‌یاند: دەبێ لەڕێگەی ئەم لێژنەیه‌ و پەرلەمان و حکوومەتی هەرێمی کوردستانەوە کاری بەپەلە و خێرا بکرێت بۆ ئەوەی چیدیکە لەلایەن حکوومەتی عێراق و میلیشیاکانەوە ئازار و ئەشکەنجەی خەڵکی ناوچە کوردستانییەکانی دەرەوەی ئیدارەی هەرێمی کوردستان نەدرێت. 

هه‌روه‌ها رایگه‌یاند: ئه‌وه‌ی به‌عس به‌ 35 ساڵ له‌ كه‌ركووك نه‌یكرد، راكان جبوری به‌ ساڵێك كردی.