وەزارەتی ئەوقاف لەسەر دیاری كردنی رۆژی جەژن روونكردنه‌وه‌ ده‌دات

شوێن بڕیاری هیچ لایەک نەکەوتوون

وتەبێژی وەزارەتی ئەوقافی هەرێم ڕایگەیاند، لیژنەکەیان لە ئێوارەی ڕۆژى دووشەممە مانگیان بینیوە بۆیە ڕۆژی سێشەممەیان کردووە بە جەژن و شوێن بڕیاری هیچ لایەک نەکەوتوون.

نەبەز ئیسماعیل وتەبێژی وەزارەتی ئەوقافی هەرێم لە ڕوونکردنەوەیەکدا ڕایگەیاندووە، ئێمە وەک وەزارەت لە پارێزگاکانی هەولێر و سلێمانی و دهۆک و ئیدارەی گەرمیان لیژنەی بینینی مانگمان هەیە و بۆ ئەم جەژنە  لە لیژنەکەی سلێمانییەوە پێیان ڕاگەیاندین کە مانگ نەبینراوە، بەڵام لە دهۆک و هەولێر بینرابوو و تەنسیق بە لیژنەی باڵاوە کرا لە وەزارەت کە مانگیان بینیوە.

ئەوەشی تێدا هاتووە، دواتر وەزارەت پەیوەندیی بە وەقفی سونیی عێراقەوە کرد و ئەوانیش دوای کەمێک وەڵامیان دایەوە کە مانگیان بینیوە و، دواتر پەیوەندی بە وڵاتی سعودییەوە کراوە و لەوێش دڵنیایان کردینەوە کە مانگ بینراوە و ئێمەش دڵنیابووین و مانگیشمان بینیبوو، بۆیە بڕیارماندا کە جەژنە.

وەزارەتی ئەوقاف ڕاشیگەیاندووە، ڕەتیدەکەینەوە ئێمە دوای وەقفی سونیی عێراقی کەوتبین، بەڵکو خۆمان مانگمان بینیوە و دڵنیا نەبووینایە نەماندەکرد بە جەژن، چونکە بەرپرسیارێتیی دینییە و نابێت بڕیار لە خۆتەوە بدەیت.

ئەمەش لەکاتێکدایە چەند کەسێک لە فەلەکەک ناسان پێیان وابووە جەژن دەکەوێت ڕۆژی چوارشەممە.

پ: سامان زاهیر