كاركردن لە چاكکردنەوەی بۆریی ئاوی ئیفراز كۆتاییهات

دابەشكردنی ئاو دەستیپێكردەوە


بەهۆی شكانی بۆری ئاوی ئیفراز لە نزیك شەقامی 120 مەتری هەولێر، ماوەی دوو رۆژ چەند گەڕەكێكی شاری هەولێر بێ ئاو بوون، بەڵام تیمەكانی چاككردنەوە توانیان بۆریه‌ شكاویەكە چاك بكەنەوە و دابەشكردنی ئاو دەستیپێكردەوە.

ئاری ئەحمەد بەڕێوەبەری ئاوی هەولێر به‌ ماڵپه‌ری كوردستان تیڤی ڕاگەیاند، له‌ كاتژمێر 6ى بەیانی ئەمڕۆ یەکشەممە، كاركردن لە چاكکردنەوەی بۆریی ئاوی ئیفراز كۆتاییهات.

ئاماژه‌ی به‌وه‌شدا لە ماوەی 24 كاتژمێری داهاتوو تەواوی ئەو گەڕەكانە ئاویان پێ بگاتەوە، كە لەو ماوەیەدا بێ ئاو بوون.

سەبارەت بە هۆكاری شكانەكەش گوتی: چەند ئەگەرێك هەن، ئەو بۆریە 32كم درێژە، رەنگە لە ساڵی 2006 ئەو پارچانەی دانراون یەكێك لە بۆریەكان یاخود واشەرەكەی جوان دانەنرابێت، ئەگەری دووەم ئەمساڵ بارانێكی زۆر باری و لە هەندێك شوێن كارێز تەقیوە، هۆكاری سێیەمیش ئەو بۆریە دەكەوێتە ژێر پردەوە و ڕەنگە بەیەكێك لەو ئەگەرانە شكاویەكە دروست بوبێت.

پ: سامان زاهیر