ژنێك له‌ سلێمانی به‌ ده‌فه‌كه‌یه‌وه‌ ھاووڵاتییان بۆ پارشێو به‌خه‌به‌ر ده‌ھێنێت

به‌ خه‌لیفه‌ ناھی ناسراوه‌

ناھی عارف ژنێكی ته‌مه‌ن ٦٣ ساڵانی دانیشتووی گه‌ڕه‌كی كارێزه‌ وشكی شاری سلێمانییه‌، ئه‌و ماوه‌ی سێ ساڵه‌ له‌ رێگه‌ی ده‌ف لێدانه‌وه‌ شه‌وانه‌ له‌ ماڵ دێته‌ ده‌ره‌وه‌ و ده‌یه‌وێت له‌و رێگه‌یه‌وه‌ دانیشتووانی گه‌ڕه‌كه‌كه‌ی بۆ پارشێو به‌خه‌به‌ر بھێنێته‌وه‌.

ناھی خێزانداره‌ و له‌ منداڵییه‌وه‌ به‌ رێبازی سۆفیگه‌ری سه‌رسام بووه‌ به‌و ھۆیه‌شه‌وه‌ له‌ناو خه‌ڵكدا به‌ خه‌لیفه‌ ناھی ناسراوه‌، ئه‌و ھاوشێوه‌ی سۆفییه‌كانی تر عاشقی ژه‌نینی ده‌فه‌ كه‌ زیاتر له‌ زیكر و ته‌ھلیله‌كانیاندا ده‌یژه‌نن ، ئه‌و ده‌ڵێت له‌ منداڵییه‌وه‌ ھێنده‌ شه‌یدای ده‌ف ژه‌نین بووه‌ سه‌ره‌تا به‌ سینی خۆی فێر كردووه‌ و ئێستاش ده‌ف ژه‌نێكی باشه‌ و له‌ زیكر و ته‌ھلیله‌كاندا به‌شداری ده‌كات.

شه‌وانه‌ له‌ كاتژمێر دووی شه‌و به‌كاتی ھه‌رێمی كوردستان خه‌لیفه‌ ناھی به‌ ده‌ف ژه‌نین و گوتنی سه‌ڵاواته‌وه‌ له‌ ماڵه‌كه‌ی خۆی دێته‌ ده‌ره‌وه‌، وه‌ك خۆی ده‌ڵێت چه‌ندێك بتوانێت بۆ ماوه‌ی نیو كاتژمێر به‌و شێوه‌یه‌ چه‌ند گه‌ڕه‌كێكی ده‌ورووبه‌ری خۆیان ده‌گه‌ڕێت و خه‌ڵكه‌كه‌ به‌خه‌به‌ر ده‌ھێنێته‌وه‌.

خه‌لیفه‌ ناھی له‌ باره‌ی كاره‌كه‌یه‌وه‌ گوتی: "ماوه‌ی چه‌ند ساڵێكه‌ ده‌ستم به‌ ده‌ف ژه‌نین كردووه‌ له‌ كاتی پارشێوان له‌ مانگی ره‌مه‌زاندا ، ئه‌وه‌ش حه‌ز و خولیایه‌كی خۆمه‌ و به‌و كاره‌ مێشكم ئاسووده‌ ده‌بێت و ھه‌ست ده‌كه‌م كه‌ كارێكی باش ده‌كه‌م و له‌لای خوداش ون نابێت".

ده‌ف ژه‌نین له‌ كاتی پارشێواندا و چه‌ند رێگه‌یه‌كی تری به‌خه‌به‌رھێنانه‌وه‌ی ئه‌و كه‌سانه‌ی له‌ مانگی ره‌مه‌زاندا به‌رۆژوو ده‌بن له‌ كۆندا به‌كارھاتووه‌، به‌ڵام له‌م ساڵانه‌ی دوایدا و به‌ ھۆی ته‌كنه‌لۆجیا و ھاتنی ئامێری نوێ ئه‌و جۆره‌ رێگایانه‌ باوی نه‌ماوه‌.

11111