له‌ باره‌ی كڕینی رۆنی خورمای (الممتاز) هۆشداری به‌ هاوڵاتیان ده‌درێت

بڕێكی زۆر له‌ ڕۆنه‌كه‌ ده‌ستی به‌سه‌رداگیرا

به‌گومانی خراپ بوون، لیژنه‌ هاوبه‌شه‌كانی سلێمانی ده‌ستی به‌سه‌ر بڕێكی زۆر رۆنی خورمادا گرت، ئه‌مه‌ش پاش پشكنینی كیمیایی ده‌ركه‌وتووه‌ كه‌ ڕۆنه‌كه‌ شیاوی خواردن نییه‌، نوێنه‌ره‌كه‌ی ته‌ندروستی له‌ لیژنه‌ هاوبه‌شه‌كان ده‌ڵێت: رۆنه‌كه‌ هۆكاره‌ بۆ دروستبونی نه‌خۆشییه‌ درێژخایه‌ن و مه‌ترسیداره‌كان.

له‌مباره‌یه‌وه‌ ئازاد نه‌بی، نوێنه‌ری به‌ڕێوه‌به‌رایه‌تی ته‌ندروستی سلێمانی له‌ لیژنه‌ هاوبه‌شه‌كان رایگه‌یاند: له‌ یه‌كێك له‌كۆگاكانی عه‌مباركردنی خوارده‌مه‌نی و له‌لایه‌ن لیژنه‌ی كۆگاكانی سه‌ربه‌لیژنه‌ هاوبه‌شه‌كانی قائیمقامیه‌ته‌وه‌، گومانی خراپبوونی ده‌ست به‌سه‌رجۆره‌ رۆنێكدا ده‌گرن‌ له‌ خورما دروست ده‌كرێت به‌ناوی (الممتاز)ه‌.

ڕاشیگه‌یاند: جارێك له‌لایه‌ن لیژنه‌كه‌وه‌ و جارێكیش له‌سه‌رداوای خاوه‌نه‌كه‌ی نمونه‌ی رۆنه‌كه‌ ره‌وانه‌ی به‌رێوه‌به‌رایه‌تی خۆپاراستنی ته‌ندروستی سلێمانی كراوه‌ بۆ پشكنینی كیمیایی، ئه‌نجامی هه‌ردوو پشكنینه‌كه‌ ده‌ریخستووه‌ كه‌ رۆنی خورمای (الممتاز) شیاوی خواردن و به‌كارهێنان نییه‌.

هه‌روه‌ها ڕاشیگه‌یاند: بڕی رۆنه‌ ده‌ست به‌سه‌رداگیراوه‌كه‌ زیاتر له‌ (14) تۆنه‌ كه‌‌ بۆنی ناخۆش بووه‌ زیانی بۆ سه‌ر ته‌ندروستی ئه‌و كه‌سانه‌ی هه‌یه‌ به‌كاری ده‌هێنن به‌تایبه‌ت نه‌خۆشییه‌ درێژخایه‌ن و نه‌خۆشییه‌ مه‌ترسیداره‌كان.

ئاماژه‌ی به‌وه‌ش كردووه‌: ته‌واوی ئه‌وبڕه‌ زه‌یته‌ی له‌لایه‌ن لیژنه‌ هاوبه‌شه‌كانه‌وه‌ ده‌ستی به‌سه‌ردا گیراوه‌ به‌فه‌رمانی قایمقامی سلێمانی له‌لایه‌ن لیژنه‌ی له‌ناوبردنی سه‌ربه‌لیژنه‌ هاوبه‌شه‌كان له‌ ناوچه‌ی تانجه‌رۆ له‌ناوده‌برێت و خاوه‌نه‌كه‌شی روبه‌روی رێكاری یاسایی ده‌كرێته‌وه‌.