له‌ سلێمانی ژمارەیەك چەكدار زەویەكانی شارەوانی دەفرۆشن

بێ گوێدانە یاساكانی حكومەت و پارێزگای سلێمانی


لیژنەى خزمەتگوزارى شارەوانى لە ئەنجوومەنی پارێزگای سلێمانى ڕایگەیاند، چەند بەرپرس و لایەنێک بە نایاسایی زەوییان داگیرکردووە و دەیفرۆشنەوە.

لە چەند ناوەچەیەكی سلێمانی ژمارەیەك چەكدار لە سنووری شارەوانی سلێمانیدا زەوی دەفرۆشن و شەوانەش دەكرێتە خانوو، ئەنجومەنی پارێزگای سلێمانیش داوای چارەسەری بەپەلە دەكات لە لایەنە پەیوەندیدارەكان.

لە میانەی كۆنگرەیەكی رۆژنامه‌وانیدا بۆ لیژنەی خزمەتگوزاری و شارەوانی لە ئەنجومەنی پارێزگای سلێمانی بەڕێوەچوو، بڕیاردەری لیژنەكە گوتی: دوای سەردانی مەیدانی بۆ ناوچەی كانی شینكە لە نزیك شوقەكانی مامۆستایان، كۆمەڵێك چەكدار بێ گوێدانە یاساكانی حكومەت و پارێزگای سلێمانی، دەستیانكردووە بە فرۆشتنی ئەو زەویانە، بێ ئەوەی لیژنەی ئەمنی سلێمانی و لایەنە پەیوەندیدارەكان هیچ ئیجرائاتێك بكەن.

گوتیشی" ئەمڕۆ لە ڕێگەی نوسراوێكەوە داوا لە سەرۆكایەتی ئەنجومەنی پارێزگای سلێمانی دەكەین، بۆ ئەوەی زەویە نایابەكانی پارێزگای سلێمانی نەكرێتە قوربانی به‌رژه‌وه‌ندی چەند كەس و لایەنێك، كە بە زەبری چەك دەیانەوێت ئەو زەویانە داگیر بكەن و پێویستە لایەنە ئەمنیەكان هەڵوێستیان هەبێت و هەریەكە لە داوكاری گشتی و پۆلیس و ئاسایش بێنە سەر خەت.

هەروەك ئاماژەیان بەوەكردووە كە زیاتر لە 500 زەوی لە كانی شینكە فرۆشراوە و لە چەند ناوەچەیەكی تر لە سنوری قەرەداغ و فەرماندەیی زەوی فرۆشراون.

ئەكرەم شەریف ئەندامی ئەنجومەنی پارێزگا لەوبارەوە گوتی: ئێمە چاوەڕوان بووین لایەنە پەیوەندیدارەكان بێنە سەر خەت بۆ چارەسەركردنی كێشەكە، بەڵام ناچار بووین ئەمڕۆ ئەم كۆنگرە ڕۆژنامەنوسیە ئەنجام بدەین و لە داهاتوودا زانیاری ورد لەوبارەوە لەسەر زەویەكان دەخەینە ڕوو.

سه‌رچاوه‌:kurdiu.org