له‌ هه‌ولێر گەنجێك ده‌ستگیركرا كه‌لە تۆڕە كۆمەڵایەتییەكاندا ھەڕەشەی لە كچان كردووه‌

وێنەی چەندین ئافرەتی لابووه‌ تا یەک یەک ھەڕەشەیان لێ بکات


ئه‌مرۆ دووشه‌ممه‌ 11 ى 2 ى 2019 ، له‌راگه‌یاندراوێكدا كه‌وێنه‌یه‌ك ده‌ست ماڵپه‌ری كوردستان تیڤى كه‌وتووه‌ ، به‌ڕێوه‌به‌رایه‌تی به‌ره‌نگاربوونه‌وه‌ی تووندوتیژی دژی ئافره‌تان له‌هه‌ولێر  ڕایده‌گه‌ێنێت ،  گەنجێك كە لە تۆڕە كۆمەڵایەتییەكان ھەڕەشەی لە كچ و ژنان كردووە، لە ھەولێر دەستگیر كرا.

 به‌ڕێوه‌به‌رایه‌تیه‌كه‌ ڕایده‌گه‌ێنێت ، بەپێی پلانێکی داڕێژراو توانرا یەکێك لەو گەنجانە دەستگیر بکرێت کەلە رێگەی تۆڕی کۆمەڵایەتی فەیسبووکەوە ھەڕەشەی ئابڕوبردنی لە کچان وئافره‌تانى دەکرد.

 راشیده‌گه‌یه‌نن دوای دەستگیرکردن و پشکنینی مۆبایلەکەی دەرکەوت کە وێنەی چەندین ئافرەتی دیكەی لای خۆی ھەڵگرتووە تا یەک یەک ھەڕەشەیان لێ بکات.

به‌ڕێوه‌به‌رایه‌تی به‌ره‌نگاربوونه‌وه‌ی تووندوتیژی دژی ئافره‌تان راشیده‌گه‌ێنێت ئەو گەنجە کە ماوەیەکە ھاوسەرگیری كردووە و دەستگیرانەكەی نازانێ كە ئەو خەریکی ئەو جۆرە کارانەیە، بە وتەی باوکی کوڕەکە زانیویانە کوڕەکەیان سەرەڕۆیە، ھەربۆیەشە ژنیان بۆ ھێناوە، تا لەو كارانە دوو بكەوێتەوە.

راشیده‌گه‌یه‌نن ، لەھەر جۆرە حاڵەتێکی ھاوشێوەو جۆرەکانی تر پەیوەندی بە ھێڵی گەرمی 119 بکەن.

شوان عه‌زیز