باڵیۆزی به‌لجیكا له‌ عێراق: پێشكه‌وتنه‌كانی هه‌رێمی كوردستان له‌بواره‌ جیاجیاكان به‌رزده‌نرخێنین

نێچیرڤان بارزانی و بالیۆزی به‌لجیكا دۆخی سیاسیی عێراق و هه‌رێمی كوردستان تاوتوێ ده‌كه‌ن

سه‌رله‌به‌یانیی ئه‌مڕۆ پێنجشه‌ممه‌ 8/11/2018  نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له‌  هنریك ڤان دیفێڵد باڵیۆزی به‌لجیكا له‌ عێراق و ئوردن و شاندێكی یاوه‌ری كرد.

له‌ دیدارێكدا  دیفێڵد باسی له‌ پرۆسه‌ی هه‌ڵبژاردن و یه‌كه‌م دانیشتنی په‌رله‌مانی كوردستان و ئاماده‌كاری بۆ پێكهێنانی كابینه‌ی نوێی حكوومه‌تی هه‌رێم كرد و پێشكه‌وتنه‌كانی هه‌رێمی كوردستانی له‌ بواره‌ جیاوازه‌كاندا به‌تایبه‌تی له‌ بواری ئابووریدا به‌رز نرخاند، هه‌روه‌ها باسی له‌ پێكهێنانی حكوومه‌تی عێراقی فیدرال كرد و به ‌پێویستی زانی به‌شدارییه‌كی به‌هێزی لایه‌نی كوردی له‌و حكوومه‌ته‌دا هه‌بێت به ‌شێوه‌یه‌ك له‌ هه‌موو ڕوویه‌كه‌وه‌ خزمه‌تگوزاری بۆ پێكهاته‌كانی عێراق دابین بكات و كێشه‌كانی هه‌ولێر ـ به‌غدا چاره‌سه‌ر بكات.

لای خۆیه‌وه‌  سه‌رۆك وه‌زیرانی هه‌رێمی كوردستان پوخته‌یه‌كی ده‌رباره‌ی چۆنیه‌تیی ده‌ستپێكردنی كۆبوونه‌وه‌ و دیداره‌كان بۆ پێكهێنانی كابینه‌ی نوێی حكوومه‌تی هه‌رێمی كوردستان پێشكه‌ش كرد و ئاماژه‌ی به‌ به‌ره‌وپێشچوونه‌كانی هه‌رێمی كوردستان به‌تایبه‌تی له‌ بواری ئابووری و باشتركردنی ژیانی هاووڵاتیان كرد و ئاماده‌ییی هه‌رێمی كوردستانی بۆ ده‌ستپێكردنی گفتوگۆكانی هه‌ولێر ـ به‌غدا به ‌مه‌به‌ستی چاره‌سه‌ركردنی ته‌واوی كێشه‌كان ده‌ربڕی.

تاوتوێكردنی ڕه‌وشی ئاواره‌كان و گه‌ڕانه‌وه‌یان بۆ زێدی خۆیان، دابینكردنی خزمه‌تگوزارییه‌ پێویسته‌كانیان و پرۆسه‌ی سیاسیی عێراق و هه‌رێمی كوردستان، لایه‌نێكی دیكه‌ی دیداره‌كه‌ بوو.

دانانى هه‌وال - شوان عه‌زیز