ئه‌مریكا: یه‌په‌گه‌ به‌ رێكخراوی تیرۆریستی نازانین

ئه‌مریكا: له‌ نیگه‌رانییه‌ ئه‌منییه‌كانی توركیا تێده‌گه‌ین

نوێنه‌ری تایبه‌تی ویلایه‌ته‌ یه‌كگرتووه‌كانی‌ ئه‌مریكا بۆ كاروبارى سوریا رایگه‌یاند، كه‌ یه‌كینه‌كانی‌ پاراستنی‌ گه‌ل "یه‌په‌گه‌" به‌ رێكخراوی تیرۆریستی نازانین.

جیمس جیفری نوێنه‌ری تایبه‌تی ویلایه‌ته‌ یه‌كگرتووه‌كانی‌ ئه‌مریكا بۆ كاوربارى سوریا له‌ كۆنگره‌یه‌كی رۆژنامه‌وانیدا، وتی‌" به‌پێچه‌وانه‌ی په‌كه‌كه‌وه‌ "یه‌په‌گه‌" به‌ رێكخراوی تیرۆریستی ناناسین. 

ئاماژه‌شی‌ به‌وه‌دا كه‌ "له‌ نیگه‌رانییه‌ ئه‌منییه‌كانی توركیا سه‌باره‌ت به‌ په‌یوه‌ندیی نێوان هه‌ردووكیان تێده‌گه‌ین. له‌به‌رئه‌وه‌ زۆر زۆر به‌وریاییه‌وه‌ مامه‌ڵه‌ ده‌كه‌ین. پێش هه‌موو شتێك زانیاری به‌ توركیا ده‌ده‌ین له‌باره‌ی ئه‌وه‌ی چیمان كردووه‌ و بۆچی ئه‌نجاممانداوه‌".

ئه‌م هه‌ڵوێسته‌ی‌ ئه‌مریكا دوای‌ ئه‌وه‌ دێت كه‌ دوێنێ‌ سێشه‌ممه‌ ویلایه‌ته‌ یه‌كگرتووه‌كانی ئه‌مریكا چه‌ند سه‌ركرده‌یه‌كی پارتی كرێكارانی كوردستان په‌كه‌كه‌ی خسته‌ لیستی داواكراوانه‌وه‌ و بڕی‌ 12 ملیۆن دۆلاریشی‌ وه‌ك پاداشت ته‌رخانكرد بۆ ئه‌و كه‌سه‌ی كه‌ زانیاری له‌سه‌ر شوێنی ئه‌و سه‌ركردانه‌ی په‌كه‌كه‌ بدات.

بەپێی لیستەکەی ئەمریکا، بڕی بەخششەکان بەمشێوەیە دەست پێدەکات: موراد قەرەیڵان پێنج ملیۆن دۆلار، جەمیل بایک چوار ملیۆن دۆلار، دوران کاڵکان سێ ملیۆن دۆلار.