له‌ ته‌قینه‌وه‌یه‌كدا 32 كوژراو و 45 برینداری لێكه‌وته‌وه‌

له‌ ناوچه‌ی سه‌رمه‌دا له‌ سنووری پارێزگای ئیدلب

له‌ ئاكامی ته‌قینه‌وه‌یه‌ك له‌ ناوچه‌ی سه‌رمه‌دا له‌ سنووری پارێزگای ئیدلب باكووری رۆژئاوای سووریا، 32 كه‌س كوژران و ٤٥ی دیكه‌ش برینداربوون.

به‌رێوه‌به‌ری به‌رگری شارستانی ئیدلب، مسته‌فا حاج یوسف له‌ لێدوانێكیدا بۆ ئاژانسی ئانادۆڵو گوتی: كاتژمێر چواری به‌ره‌به‌یانی ئه‌مڕۆ، ته‌قینه‌وه‌یه‌كی گه‌وره‌ له‌و شوێنه‌ی كه‌ ئاواره‌كانی باكووری حومس تیادا ده‌ژین له‌ شارۆچكه‌ی سه‌رمه‌دا روویداوه‌.

حاج یوسف گوتیشی: له‌ ئه‌نجامی ته‌قینه‌وه‌كه‌ بینایه‌كی شه‌ش نھۆمی كه‌ ئاواره‌كانی باكووری حومس تیادا ده‌ژین رووخاوه‌ به‌و هۆیه‌وه‌شه‌وه‌ 32 مه‌ده‌نی كوژراون و به‌لانیكه‌م 45 كه‌س برینداربوون.

به‌رێوه‌به‌ری به‌رگری شارستانی ئیدلب، مسته‌فا حاج یوسف ئاشكراشی كرد كه‌ 13 مه‌ده‌نی له‌ كاره‌كانی به‌دواگه‌ڕاندا رزگاركراون و برینداره‌كانیش ره‌وانه‌ی نه‌خۆشخانه‌كانی ناوچه‌كه‌ كراون.

به‌رپرسانی ناوچه‌كه‌ لێكۆڵینه‌وه‌یان له‌ ھۆكاری ته‌قینه‌وه‌كه‌ ده‌ستپێكردووه‌.