دارا جەلیل خەیات: بازرگانانی سعوودیه‌ دەیانەوێت وەبەرھێنان لە كوردستان بكەن

دەرگای بازرگانیی ھەموو وڵاتان ھەمیشە واڵایە بۆ هه‌رێم

سەرۆكی یەكێتیی ژووری بازرگانیی ھەرێم گوتی، ھاتنی شاندی بازرگانانی سعوودیه‌ بۆ ھەرێمی كوردستان، دەرفەتێكی باشە بۆ ئەوەی وەبەرھێنان لە ھەرێمی كوردستاندا بكەن، بێگومان بۆیەشە كوردستانیان ھەڵبژاردووە، چونكە دەزانن شوێنێكی ئارام و سەقامگیرە.

دوێنێ شاندێكی بازرگانانی سعوودیه‌ كە 35 بازرگان و وەبەرھێنەر بوون، لەگەڵ باڵیۆزی سعوودیا لە عێراق سەردانی ھەرێمی كوردستانیان كرد، كە ئەمەیش یەكەم سەردانی ئەوانە بۆ ھەرێمی كوردستان و بڕیاریشە بۆ پەرەپێدانی پەیوەندیی بازرگانیی نێوان ھەرێم و سعوودیا، ئەمڕۆ دیدارێك لە ھەولێر ساز بكەن.

دارا جەلیل خەیات، سەرۆكی یەكێتیی ژووری بازرگانیی ھەرێمی كوردستان بە ماڵپەڕی فەرمیی پارتی دیموكراتی كوردستانی ڕاگەیاند: دوای ئەوەی دوێنێ شاندی بازرگانانی سعوودیه‌ سەردانی ھەرێمی كوردستانیان كرد، كە بۆ یەكەم جارە، بڕیارە ئەمڕۆ دیدارێك لە نێوان بازرگانانی سعوودیه‌ و ژووری یەكێتیی بازرگانانی ھەرێم ساز بكرێت، كە بە ئامادەبوونی خاوەنكار و بازرگاكانان و بەرپرسانی حكوومەت لەوەزارەتی شارەوانی و گەشتوگوزار و پلاندانان ودارایی دەبێت، ئەمەیش بۆ پێشخستنی پەیوەندییە بازرگانییەكانی نێوان ھەرێم و سعوودیایە.

لەبارەی گرینگیی سەردانی ئەو شاندە بازرگانیەی سعوودیه‌، ئەو گوتی: مەبەست لە ھاتنی ئەو شاندە، بۆ پتەوكردنی پەیوەندیی بازرگانی و وەبەرھێنانە لە ھەرێمی كوردستان، جگە لەوەیش ئەمە دەبێتە دەرفەتێكی باش بۆ ئەوەی بازرگانە سعوودییه‌كان بێنە ھەرێمی كوردستان وەبەرھێنان بكەن و ئێمەیش كۆمەڵێك پڕۆژەیان دەخەینە بەردەم بۆ ئەوەی جێبەجێیان بكەن.

سەبارەت بە ھەڵبژاردنی ھەرێمی كوردستان بۆ ئەوەی بازرگه‌نە سعوودییەكان بێن وەبەرھێنانی لێ بكەن، خەیات گوتی: دەرگای بازرگانیی ھەموو وڵاتان ھەمیشە واڵایە و ھاتنی بازرگانانی سعوودیه‌یش بۆ ھەرێمی كوردستان، بۆ ئەوە دەگەڕێتەوە، كە ھەرێمی كوردستان شوێنێكی ئارام و سەقامگیرە، بۆ ئەوەی ئەوان بتوانن وەبەرھێنانی تێدا بكەن و ئێمەیش پێشوازییان لێ دەكەین و رێزیان دەگرین و ھەموو ئاسانكارییەكیشیان بۆ دەكەین.