Serok Barzanî: Daxwazê ji hemû aliyan dikim pirsgirêkên xwe nehînin nav Kurdistanê

dibêje bila kes kêşeyên xwe neyêne nava axa Kurdistanê

Serok Barzanî derbarê girtina tometbarên êrîşa li Hewlêrê de peyamek belav kir û ragihand: "Daxwazê ji hemû aliyan dikim, pirsgirêkên xwe nehînin nav Kurdistanê û nebin sedema zirargihandina bi xelkê Kurdistanê."

Serok Mesûd Barzanî di peyama xwe de ku îro Şemî 20ê Tîrmeha 2019an belav kiriye, dibêje: "Piştî buyera terorîstiya roja Çarşemî 17-07-2019, ku li xwaringehekî Hewlêrê çêbû û dîplomatekî Tirkiyê û du hevwelatiyên sivîl ên Kurdistanê bûne qurbanî, bi kêfxweşî ve îro hêzên Asayiş û Dije-Terora Kurdistanê karîn encamderê serekî yê wê tawanê û hevkarekî wî desteser bikin."

Serok Barzanî destxweşiyê li dezgehên ewlehiyê yên Kurdistanê dike û dibêje: "Pir bi germî destxweşî li qehremanên Asayiş û Dije-Teror û hemû dezgehên ewlehiyê yên Kurdistanê dikim ku karîn di zûtirîn dem de tawanbaran desteser bikin û wek herdem îsbat kirin ku cihê baweriyê û şanaziyê ne."

Di beşeke din a peyama xwe de, Serok Barzanî tekezî li ser wê yekê dike,ku Kurdistan ti carî nabe pêgeha terorê û ti tawanbarek jî nikare ji destê dezgehên ewlehiyê yên Kurdistanê xilas bibe û jibo dilsozî û hevkariya li gel saziyên ewlehiyê, spasiya xelkê Kurdistanê kir.

Serok Barzanî wiha dibêje: "Herwiha spas jibo hevwelatiyên xweştivî ku di vê heyamê de alîkar û piştevanê hêzên ewlehiyê bûn. Xelk û dezgehên ewlehiyê careke din îsbat kirin, Kurdistan ti carî nabe pêgeha terorê û ti tawanbarek jî ji çavê xelkê dilsozê Kurdistanê û eloyên dezgehên ewlehiyê yên Kurdistanê winda nabin."

Di dawiya payama xwe de, Serok Barzanî daxwazekê dike û radigihîne: "Her li vir daxwaz ji hemû aliyan dikim, pirsgirêkên xwe nehînin nav Kurdistanê û nebin sedema gihandina ziraran bi xelkê Kurdistanê.