Belgefîlmê "Bîra Mi' Têtin" di Festîvala fîlman a Babelê de xelat stend

fîlma Kurdî di 5mîn festîvala Babîlê de xelat stend

Fîlmê Selim Yildiz yê bi navê "Bîra mi' Têtin" ku li ser komkujiya Roboskiyê, jiyana rojane û bazirganiya ser sînoran radiweste di 5emîn Festîvala Fîlma a Babelê de xelata ‘Diari Di Cineclup' stend.

Derhêner Yildiz ji Sputnik Kurdistanê re axivî û got, "Dema ku çîrokeke min (film) ji deverekê xelatekê bistîne ligel hemû kêmasiyan ez ji xwe re dibêjim ku bi herhal ez ji bin vî barî rabûme, ev yek min şad û bextewar dike."

Yildiz diyar dike ku fîlm li ser komkujiya Robokiyê, jiyana rojane û bazirganiya ser sînoran e û wiha axivî, "Malbatên Roboskiyê jî bi filmî û bi xelatê kêfxweş bûn. Ez bawer im ew ji me bêhtir dişopînin. Hindek caran ew bi xwe me agahdar dikin. Ev bû 6 sal. Bi malbatên li wir têkiliyên me xurt in. Lewra hemû bûyeran bi me re parve dikin. Em heman êş û azaran dikşînin lê bextewariyên me yên piçûk jî çêdibin elbet. Bo nimûne, em bi hevre ji piçûkên nûhatî re navan dibînin."