پارێزگه‌ها دهۆكێ: دڤێت هه‌موو فه‌رمانبه‌ر هه‌تا 1-1-2022 ڤاكسینا دژى نه‌خوشیا كورونایێ وه‌رگرن


ئه‌ڤرۆ پشتى نیڤرو 28-10-2021 ب سه‌رپه‌رشتیا  ماجد سه‌ید صالح وشمعون شلیمون جێگرێن پارێزگارێ دهۆكێ كۆمبوونه‌كا تایبه‌ت دگه‌ل رێڤه‌به‌ر وسه‌روك پشكێن كارگێریا پارێزگه‌ها دهۆكێ هاته‌ ئه‌نجامدان.
دكۆمبوونێدا به‌حسێ رێكار ورێنمایێن نوو  یێن خو پارێزیێ  ژنه‌خوشیا كورونایێ  ودانانا  ڤاكسینێ دژى نه‌خوشیێ و پێگریكرنا فه‌رمانبه‌ران ب ده‌واما رۆژانه‌ ب گشتى هاته‌ كرن.
جێگرێن پارێزگارێ دهۆكێ ته‌كه‌زى ل سه‌ر وێ چه‌ندێ كر كو دڤێت هه‌موو  فه‌رمانبه‌ر ب تایبه‌ت فه‌رمانبه‌رێن دیوانا پارێزگه‌هێ ب هه‌موو پشكێن وێڤه‌  پێگریێ ب ده‌واما رۆژانه‌ بكه‌ن وبه‌رده‌وام ماسكا ب كاربینن هه‌روه‌سا ئه‌و هاولاتیێن سه‌ره‌دانا دیوانا پارێزگه‌هێ ژى دكه‌ن دڤێت ماسكا ب كاربینن ویێ پێگریێ پێنه‌كه‌ت دێ ل دووڤ یاسا ورێنمایان هێته‌ سزادان هه‌روه‌سا دڤێت هه‌موو فه‌رمانبه‌ر هه‌تا رێكه‌فتى 1-1-2022 ڤاكسینێ وه‌رگرن دا ژتوشبونا نه‌خوشیا كورونایێ بهێنه‌ پاراستن.
هه‌روه‌سا دیاركر كو هه‌موو ماموستا وقوتابیێن ژیێ وان ل سه‌ر 18 سالیێ دا دڤێت هه‌تا 1-12-2021ڤاكسینێ وه‌رگرن دا توشى چ سزایێن یاسایى نه‌بن.
دكۆمبوونێدا هاته‌ دیاركرن كو به‌هى هاتینه‌ قه‌ده‌غه‌كرن وكور وسمینار وخرڤه‌بوونێن گشتى نا هێنه‌ كرن وهه‌كه‌ هاتنه‌ ئه‌نجامدان ژى دڤێت پشكدارا ڤاكسین وه‌رگرتبیت  وماسكا ژى  ب كاربینن وشوفێرێن ته‌كسى وپاس ومینى پاسا وسه‌رنشینێن وان ماسكا ب كاربینن دا ره‌وشا ته‌ندورستیا گشتى یا هاولاتیان باشتر بهێته‌ پاراستن.
دهێته‌ زانین رێژا ڤاكسیندانێ ل پارێزگه‌ها دهۆكێ ئێكه‌مینه‌ ل سه‌ر ئاستێ هه‌رێمێ وعیراقێ وهه‌تا نوكه‌ گه‌هشتیه‌ 18,74% ورێڤه‌به‌ریا گشتى یا ساخله‌میێ ڤاكسین وبنگه‌هێن دانانا ڤاكسینێ ل هه‌موو پارێزگه‌هێ زێده‌كرینه‌ بو وێ یه‌كێ هاولاتى ب ساناهیتر ڤاكسینێ وه‌رگرن.