سەرۆکی حکومەتی هەرێمی کوردستان ساڵی نوێی کۆچی لە موسڵمانان پیرۆز دەکات

مەسرور بارزانی سەرۆکی حکومەتی هەرێمی کوردستان له‌ په‌یامێكدا یەکی موحەڕڕەم و سه‌ری ساڵی نوێی كۆچیی، پیرۆزبایی له‌ ته‌واوى موسڵمانان ده‌كات و رایگه‌یاند: هیوادارم ڕێنمایی تەندروستی و ڕێکارەکانی خۆپارێزی لە کۆرۆنا لەبەرچاو بگرن و خۆتان بپارێزن.

بە بۆنەی ساڵی نوێی کۆچی، گەرمترین پیرۆزبایی ئاراستەی موسڵمانانی کوردستان و عێراق و جیهان دەکەم، لە خوای مەزن داواکارم ساڵی نوێ، ساڵی خێر و خۆشی و خۆشگوزەرانی و سەقامگیربوونی ئاشتی و ئارامی و کۆتاییهاتنی پەتای کۆرۆنا بێت لە جیهان و ناوچەکەدا. هیوادارم ڕێنمایی تەندروستی و ڕێکارەکانی خۆپارێزی لە کۆرۆنا لەبەرچاو بگرن و خۆتان بپارێزن.

ئەم بۆنە پیرۆزەی هیجرەتی پێغەمبەری ئیسلام حەزرەتی محەممەد ( دروودی خوای لە سەر بێت )، هانمان دەدات لە سەر برەودانی زیاتر بە گیانی لێبوردەیی و تەبایی و بەیەکەوەژیانی ئاشتییانەی پێکهاتە جیاوازەکانی هەرێمی کوردستان .  
ساڵی نوێی کۆچی پیرۆز بێت و کوردستانیان و مرۆڤایەتی پارێزراو و تەندروست بن.

مەسرور بارزانی
سەرۆکی حکومەتی هەرێمی کوردستان