نه‌جلا مه‌نگۆش: داوا له‌ توركیا ده‌كه‌ين هێزه‌كانی له‌ لیبیا بكێشێته‌وه‌

شاندێكی توركیا له‌ لیبیایه‌ و له‌گه‌ڵ به‌رپرسانی لیبیا كۆبووه‌ته‌وه‌

وه‌زیری ده‌ره‌وه‌ی حكوومه‌تی ویفاقی نیشتمانی لیبیا نه‌جلا مه‌نگۆش له‌ میانی كۆنگره‌یه‌كی رۆژنامه‌نووسی هاوبه‌شدا له‌گه‌ڵ وه‌زیری ده‌ره‌وه‌ی توركیا مه‌ولوود چاوشئۆغڵو رایگه‌یاند كه‌ پێویسته‌ سه‌ربازانی توركیا و ئه‌و هێزه‌ چه‌كدارانه‌ی كه‌ له‌ به‌رامبه‌ر وه‌رگرتنی پاره‌ له‌ لایه‌ن توركیاوه‌ روانه‌ی لیبیا كراون له‌ لیبیا بكێشێنره‌وه‌.

نه‌جلا مه‌نگۆش كه‌ پێشتریش چه‌ندین لێدوانی دژی هه‌بوونی هێزه‌كانی توركیا و چه‌كدارانی سه‌ربه‌ توركیا له‌ لیبیا دابوو رایگه‌یاند كه‌ هه‌بوونی ئه‌و هێزه‌ بیانییانه‌ له‌ لیبیا له‌ به‌رده‌م پڕۆسه‌ی سیاسی و هێوه‌ركردنه‌وه‌ی دۆخی لیبیا ئاسته‌نگن بۆیه‌ پێویسته‌ ئه‌م هێزانه‌ بكێشێنره‌وه‌.

له‌ سه‌رده‌می شه‌ڕی ناوخۆیی لیبیادا حكوومه‌تی توركیا بۆ پشتیوانی كردن له‌ حكوومه‌تی ویفاقی نیشتمانی لیبیا بێجگه‌ له‌ سوپای خۆی، ژماره‌یه‌كی زۆر له‌ چه‌كدارنی سووریای له‌ به‌رامبه‌ر پێدانی مووچه‌ی مانگانه‌ روانه‌ی لیبیا كردبوو بۆ ئه‌وه‌ی شه‌ڕی دژی حكوومه‌تی نیشتمانی به‌ سه‌رۆكایه‌تی خه‌لیفه‌ خه‌فته‌ر بكه‌ن.

له‌لایه‌كی دیكه‌وه‌ دوینێ دووشه‌ممه‌ شاندێكی باڵای توركیا كه‌ پێكهاتبوو له‌ وه‌زیری ده‌ره‌وه‌ی، وه‌زیری به‌رگری، به‌رپرسی میتی توركیا وسوپاسالاری توركیا، سه‌ردانی لیبیای كردبوو و داوای له‌به‌رپرسانی لیبیا كردبوو كه‌ ئه‌و رێككه‌وتنه‌ ستراتیژیكی و سه‌ربازییانه‌ی له‌ نێوان توركیا و لیبیادا ئیمزا كراون جێبه‌جێ بكرێن كه‌چی له‌ به‌رامبه‌ردا به‌رپرسانی لیبیا داوای كێشانه‌وه‌ی سوپای توركیا و چه‌كداره‌كانی سه‌ربه‌ توركیا له‌ نێو خاكی وڵاته‌كه‌یاندا ده‌كه‌ن. ئه‌رده‌لان گۆران