دوایین بارانبارینی ئەمساڵ زیانی بە بەشێك لە كێڵگەكانی گەنم داوە

لەئەنجامی بارانباریندا لە وەرزی داچاندنی بەروبوومی گەنمدا، لەمساڵدا بەرهەمی گەنم زیادی كردووە، بەڵام هەندێك لە شارەزایان پێیان وایە كە دوایین باران، زیانی داوە بە بەشێك لە كێڵگەكانی گەنم و داكەوتوون.
لەوبارەیەوە پشتیوان حەمەعەلی، لێپرسراوی بەشی بەرهەمهێنان و پەرەسەندنی تۆو لە بەڕێوەبەرایەتی گشتیی كشتوكاڵی سلێمانی گوتی:لەبارەی زەرەروزیانی ئەو بارانەی لە چەندڕۆژی پێشوودا باری، بەداخەوە ئەو گەنمانەی باڵایان زۆر بەرزە و بەهێزن و گوڵ و دانیان پڕ كردووە كەوتوون و زیانیان پێ گەیشتووە. زۆربەی كێڵگەكانی گەنمی ئەمساڵمان بەو شێوەیەن كە گەنمەكان باڵایان زۆر بەرزە و بەهێزن، لەبەرئەوەی بارانبارین و كەشوهەوا لەبار بووە بۆ ئەوەی گەنمەكانمان بەهێز و پڕدان بن، هەروەها جووتیارانیش لەبەر خەمی بەرهەمەكانیان و بوونی بازاڕێكی باش بۆ ساغبوونەوەی گەنمەكانیان و باشی نرخی گەنم لە سایلۆكاندا، لەژێر رێنمایی ئێمە وەكوو بەڕێوەبەرایەتیی گشتیی كشتوكاڵی سلێمانی خزمەتێكی زۆر باشی كێڵگەكانیان كردووە و سەمادێكی زۆریان داوە بە گەنمەكان بەو ئامانجەی كە بەرهەمێكی باشیان هەبێت. 
لەلایەكی دیكەیشەوە، هەندێك لە جووتیاران كەمێك پڕتر گەنمەكانیان چاندووە و رێژەی زیاتریان بەكارهێناوە بۆ ئەوەی زۆرترین ژمارەی رووەكیان هەبێت كە لە رووە زانستییەكەیشەوە دروستە، هەموو ئەمانە وایان كرد رووەكەكانمان باڵایان بەرز بێت و لە كاتی بوونی كەشوهەوایەكی ناسەقامگیر و نالەبار و بارانێكی زۆر بەهێز بەباوە بەشێك لە گەنمەكان بكەون و زیانیان پێبگات.
ئاماژەی بەوەشكرد، ئەم بارانەی ئەم چەندڕۆژەی دوایی سوودی بەو كێڵگەیانە گەیاندووە كە درەنگ گەنمیان تیادا كراوە یان هێشتا لە قۆناغی سەوزیدان، یان گەنمەكان هێشتا لە قۆناغی شیری و پڕكردنی داندان و دەڵێت :بوونی باران و رێژەیەكی باشی شێ بۆ پڕكردنی دانی ئەم كێڵگە گەنمانە سوودبەخشە، بەڵام لەو رووەوەی كە بارانەكە بەهێز بووە و بە باوە باریوە بۆ ئەو كێڵگانەی گەنم كە باڵایان بەرزە و پڕدانن زیانی هەبووە و گەنمەكانی خستوون كە ئەمەیش بۆ كاتی دروێنەكردن دەڕاسەكان بە زەحمەت دەتوانن هەڵیانبگرنەوە و زیان بە جووتیارەكە دەگەیەنێت.