ئێران وەڵامی هەڕەشەكانی ئیسرائیل دەداتەوە 

ئێران جەختی لەوە كردەوە كە بە ئامانجكردنی دامەزراوە ئەتۆمییەكانی لەلایەن ئیسرائیلەوە، بە واتای هەڵگیرسانی شەڕێكی بەرفراوان دێت و بەرپرسیارێتیەكەش دەكەوێتە ئەستۆی ئەو وڵاتەوە. 
بەرپرسێكی ئێرانی، لە لێدوانێكیدا بۆ كەناڵی جەزیرە ڕایگەیاندووە، دەبێت جیهان بزانێت هیچ هێڵی سوور لە وەڵامدانەوەی تاران بۆ ئیسرائیل نییە.
هەروەها گوتی: ئیسرائیل هەوڵ دەدات پاساو بۆ هێرشەكانی بۆ سەر سوریا بهێنێتەوە و ترسی ئەوەی هەیە دیمەشق بە هاوكاری ئێران بەرگری ئاسمانی خۆی بەهێزتر بكات، جەختیشی لەوە كردەوە كە ئیسرائیل لاوازییەكی ناوخۆیی بێ وێنە بەخۆیەوە دەبینێت و هەوڵدەدات بەهێز دەربكەوێت.
دوێنێ سێشەممە، هێرتسی هالیڤی ، سەرۆكی ئەركانی سوپای ئیسرائیل ڕایگەیاند، ئیسرائیل توانای لێدانی ئێرانی هەیە ئەگەر پێشكەوتنی ئێران لە بەرنامە ئەتۆمییەكەیدا ببێتە هۆی پێشكەوتنی نەرێنی لە ناوچەكەدا.