وه‌زاره‌تی دارایی و ئابووری حكوومه‌تی هه‌رێمی كوردستان ئه‌مڕۆ پێنجشه‌م ڕوونكردنه‌وه‌یه‌كی له‌سه‌ر ئه‌و 400 ملیار دیناره بڵاو كرده‌وه كه له‌لایه‌ن ئه‌نجوومه‌نی وه‌زیرانی عێراقه‌وه بڕیاری ناردنی درابوو.
وه‌زاره‌تی دارایی له ڕوونكردنه‌وه‌كه‌دا ڕایگه‌یاند: لەسەر ئەو چەواشەکارییانەی تایبەت بە پرسی 400 ملیار دینارەکە لە چەند سایت و پەیج و دەزگایەکی ڕاگەیاندن بڵاوبۆتەوە، بە پێویستمان زانی ئەم ڕوونکردنەوەیە بۆ ڕای گشتی بخەینە ڕوو.
1- بڕی ئەو 400 ملیار دینارە لەلایەن ئەنجوومەنی وەزیرانی عێراقەوە بۆ مانگی تشرینی دووەم و کانونی یەکەمی ساڵی 2022 بڕیاری لەسەر درابوو، بەڵام بە چەند هۆکارێک دواخرا و لە سەرەتای ئەم مانگە خرایە سەر هەژماری بانکی وەزارەتی دارایی و ئابووری هەرێمی کوردستان.
2- وەزیری دارایی و ئابووری حکوومەتی هەرێم ڕۆژی 14 ئازار لە لێدوانێکی ڕۆژنامەوانیدا ڕایگەیاندبوو 400 ملیار دینارەکە تەنها بۆ مووچە هاتووە و بۆ هیچ بابەتێکی تر خەرج ناکرێت و مووچەی مانگی ئازاریش بەبێ کێشە دابەش دەکرێت.
3- جەخت دەکەینەوە ئەو ڕێژەیەی مانگانە لە وەزارەتی دارایی و ئابووری هەرێم بۆ سلێمانی خەرج کراوە و خەرج دەکرێت، هیچ گۆڕانکارییەکی بەسەردا نەهاتووە.
4- بەهۆی دابەزینی داهاتی نەوتەوە کە بۆ مووچەی مانگی شوبات تەنها 340 ملیار دینار لە وەزارەتی سامانە سروشتییەکانەوە خراوەتە سەر حسابی وەزارەتی دارایی و ئابووری، لەگەڵ 400 ملیار دینارەکەی بەغدا بۆ مووچەی مانگی شوبات تەرخان کراوە و ئەو کورتهێنانەشی دروستبووە لە داهاتی ناوخۆ پڕ دەکرێتەوە، هەروەکو چۆن پێشتر کراوە.
کۆمێنت (0)
تا ئێستا هیچ کۆمێنتێک نەکراوە.