سەرچاوەیەك لە حكوومەتی هەرێمی كوردستان ئاشكرای كرد كە حكوومەتی عێراق بڕیاریداوە تا كۆتایی ئەمساڵ مووچەی مووچەخۆرانی هەرێمی كوردستان بنێرێت.
هێمن میرانی بەڕێوەبەری گشتیی دیوانی وەزارەتی ناوخۆ بەرهەمی کۆبوونەوەكانی دوو رۆژی رابردووی هاوبەشی نێوان ئەنجوومەنی وەزاری ئابووری لە هەردوو حکوومەتی هەرێمی كوردستان و حكوومەتی فیدڕالی بڵاو كردەوە.
میرانی كە لە كۆبوونەوەكانی دوو رۆژی رابردووی شاندی هەرێمی كوردستان و حكوومەتی فیدڕال بەشداربوو، رایگەیاند: ئەنجوومەنی وەزیرانی عێراق بڕیاری دا تا کۆتایی ساڵ مووچەی فەرمانبەرانی هەرێمی کوردستان بەردەوام بێت.
بەڕێوەبەری گشتیی دیوانی وەزارەتی ناوخۆ هەروەها رایگەیاند: لەبەرامبەریشدا حکوومەتی هەرێمی کوردستان تا سەری ساڵ بایۆمەتری و هەژماری من تەواو دەکات.
ئەمە لە كاتێكدایە كە لە كۆبوونەوەی ئەمڕۆ سێشەممەی ئەنجوومەنی وەزیرانی عێراق، بڕیاری خەرجكردنی مووچە راگیراوەكانی مووچەخۆرانی هەرێمی كوردستانی دەركرا.
دوای ئەوەی شەوی رابردوو لە راگەیەنراوی هاوبەشی ئەنجوومەنی ئابووری عێراق و هەرێمی كوردستان بڕیاردرابوو بە ئاراستەكردنی راسپاردەیەك بۆ ئەنجوومەنی وەزیرانی عێراق بە مەبەستی خەرجكردنی مووچە راگیراوەكانی هەرێمی كوردستان ئەوانەی بە هۆی تەواونەکردنی بایۆمەترییەوە دوورخرابوونەوە.
کۆمێنت (0)
تا ئێستا هیچ کۆمێنتێک نەکراوە.