دوو ئەندامی ئەنجوومەنی پارێزگای كەركووك ئاشكرای دەكەن كە ئەندامانی ئەنجوومەن ئاگاداری كۆبوونەوەكەی فندق رەشیدی شاری بەغدا نەبوونە بۆ دیاریكردنی پارێزگار و سەرۆكی ئەنجوومەن، بۆیە كۆبوونەوەكە نایاساییە.
حەسەن مەجید رەشید و شۆخان حەسیب حوسێن هەردوو ئەندامی ئەنجوومەنی پارێزگای كەركووك لە روونكردنەوەیەكدا بۆ رای گشتی رایانگەیاند "رۆژی 10 ئاب لە فندق رەشید لە شاری بەغدا کۆبوونەوەیەک ئەنجامدراوە بە ناوی ئەنجوومەنی پارێزگای کەرکووك".
راشیگەیاند "لێرەدا بە هەموولایەکی رادەگەینین كە ئێمەی ئەندامانی ئەنجوومەنی پارێزگای کەرکووک بەهیچ شێوەیەک ئاگاداری ئەو کۆبوونەوە نەبووینە و ئاگادار نەکراوینەتەوە لە ئەنجامدانی کۆبوونەوەی ئەنجوومەن".
هەردوو ئەندامەكە ئاماژەیان بەوەش دا "كۆبوونەوەكە پێچەوانەی مادەی 7 لە یاسای ژمارە 21ی ساڵی 2008ی هەموارکراوە".
جەختیشیان كردەوە "بۆیە رێکارەکانی گرێدانی ئەو دانیشتنە بە نایاسایی لە قەڵەم دەدەین و داوا دەکەین پڕۆسەی هەڵبژاردنی پارێزگار و سەرۆکی ئەنجوومەن و حکوومەتی خۆجیی بەشێوەیەکی یاسایی بەرێوەبچێت".
کۆمێنت (0)
تا ئێستا هیچ کۆمێنتێک نەکراوە.