یانەی ریال مەدریدی ئیسپانی ئەمرۆ چوارشەممە بەفەرمی درێژكردنەوەی گرێبەستەكەی لوكا مۆدریچ ئەستێرەی كڕواتی و ناوەڕاستكاری یانەكەی راگەیاند.
درێژكردنەوەی گرێبەستەكەی مۆدریچ /38 ساڵ/ بۆ ماوەی وەرزێكە، بەمەش ئەو كاپتن و ئەستێرەیەی كڕواتیا بۆ وەرزی داهاتووش لە ریزی یانەی شاهانە بەردەوام دەبێت.
گرێبەستەكەی مۆدریچ كە كۆتایی وەرزی رابردوو (2023-2024) كۆتایی هاتبوو، پێشتر بەڵێنی بە هاندەرانی یانەی ریال مەدرید دابوو لەگەڵیان بمێنێتەوە.
مۆدریچ كە لە ساڵی 2012ـەوە لە ریزی یانەی ریال مەدرید یاری دەكات، بە یەكەم یاریزانی یانەی شاهانە دادەنرێت كە زۆرترین ناسناوی لەگەڵ یانەكە بردبێتەوە كە ژمارەكەی 26 ناسناوە.
مۆدریچ وەرزی رابردووش ناسناوی ژمارە 15ی خولی یانە پاڵەوانەكانی ئەوروپای لەگەڵ یانەی شاهانە بردەوە.
مۆدریچ كە لە چەند رۆژی رابردوودا لەگەڵ هەڵبژاردەی وڵاتەكەی بەشداری لە جامی یۆڕۆی 2024ی كردبوو، پێشبینی دەكرا هاوشێوەی تۆنی كڕوزی هاوڕێی وازهێنانی یەكجاری لە یاریكردن رابگەیەنێت، بەڵام وادیارە دەیەوێت بەردەوام بێت تەنانەت لە یاریی نێودەڵەتیش لەگەڵ هەڵبژاردەی كڕواتیا.
کۆمێنت (0)
تا ئێستا هیچ کۆمێنتێک نەکراوە.