هەردوو مەكتەبی سیاسی پارتی و یەكێتی راگەیەندراوێكی هاوبەشیان بڵاوكردەوە

كۆبوونەوەی هاوبەشی هەردوو مەكتەبی سیاسی پارتی دیموكراتی كوردستان و یەكێتی نیشتمانیی كوردستان لە دەباشان بەڕێوەچوو،دوای كۆبوونەوەكەش راگەیەندراوێكیان بڵاوكردەوە كە ئەمە دەقەكەیەتی ..
كۆبوونەوە دوای هەڵسەنگاندن و گفتوگۆ لەسەر بارودۆخی سیاسی و ئابووری  هەرێم و كێشەچارەسەر نەكراوەكان لەگەڵ حكومەتی فیدڕاڵ بە گشتی و بودجە و بژێوی ژیان و موچەی فەرمانبەران بە تایبەتی، لەلایەك و هەڵبژاردنەكانی  ئەنجوومەنی پارێزگاكان لەلایەكی دیكەوە، دوای بیروڕا گۆڕینەوە و لەبەرچاوگرتنی بەرژەوەندی باڵای نەتەوەیی و نیشتمانیی هاوڕابووین لەسەر ئەم خاڵانەی خوارەوە :
١ - هەردوولا كۆك بووین لەم قۆناغەدا لەپێناو بەرژەوەندی هاووڵاتیانی پارێزگای كەركوك بە هەموو پێكهاتەكانیەوە پارێزگارێكی كورد دیاری بكرێت بۆ خزمەتی خەڵكی شارو شارۆچكەكان .
٢ - هەردوولا هاوڕابووین ئەركی سەرشانی یەكێتی و پارتی و سەرجەم لایەنە كوردستانییەكانە قەوارەی هەرێم  بپارێزن و پارێزگاری لە دەستكەوتەكانی شۆڕش و خەبات و خوێنی شەهیدانی كوردستان بكەین .
٣ - بۆ چارەسەری كێشە سیاسی و ئابوورییەكانی هەرێم لەگەڵ حكومەتی فیدڕاڵی لەئاستێكی باڵا هەردوولا پێكەوە هەوڵی چارەسەركردنی كێشەكان بەگشتی و بژیوی و ژیان و خزمەتگوزاری و بودجە و مووچە بدەین بە تایبەتی.
یەكێتیی نیشتمانیی كوردستان 
پارتی دیموكراتی كوردستان