نێچیرڤان بارزانی لەگەڵ وەزیری دەرەوەی توركیا كۆبووەوە‏

بەیانیی ئەمڕۆ پێنجشەممە 2023/8/24 نێچیرڤان بارزانی، سەرۆكی هەرێمی ‏كوردستان پێشوازی لە هاكان فیدان، وەزیری دەرەوەی توركیا كرد.‏
لە كۆبوونەوەیەكدا كە جێگرانی سەرۆكی هەرێمی كوردستان ئامادەی بوون، پەیوەندییەكانی توركیا لەگەڵ عێراق و هەرێمی كوردستان و ‏بوارەكانی هاریكاریی هاوبەشی نێوانیان، پەیوەندی و كێشەكانی هەولێر ـ بەغدا و ‏گفتوگۆی چارەسەركردنیان، دۆخی عێراق و هەرێمی كوردستان بەگشتی تاوتوێ ‏كران.‏
نێچیرڤان بارزانی وێڕای دەربڕینی خۆشحاڵی بە سەردانەكە، دووپاتی ‏كردەوە هەرێمی كوردستان بە گرنگی و بایەخەوە لە پەیوەندییەكانی لەگەڵ توركیا ‏دەڕوانێت كە بەرژەوەندیی هاوبەشی ئابووری، بازرگانی و ئەمنی پێكەوە ‏دەیانبەستێتەوه و ئامادەیە لە هەموو بوارەكاندا برەو بە پەیوەندییەكانی هەولێر ـ ‏ئەنقەرە بدات، هەروەها سوپاسی توركیای كرد بۆ پشتگیری لە هەرێمی كوردستان ‏لە هەموو بوارەكان و بەتایبەتی لە كاتە سەختەكاندا و ئاماژەی بەوە كرد كە هەرێمی ‏كوردستان هەرگیز پشتگیری و هاوكارییەكانی توركیا لەبیر ناكات.‏
لای خۆیەوە وەزیری دەرەوەی توركیا جەختی لەوە كردەوە كە توركیا ‏گرنگییەكی تایبەت بە پەیوەندییەكانی لەگەڵ عێراق و هەرێمی كوردستان دەدات و ‏بەغدا و هەولێر گرنگییەكی تایبەتیان بۆ توركیا هەیە. هەروەها ستایشی ئارامی و ‏سەقامگیریی هەولێر و هەرێمی كوردستانی كرد و ئامادەییی وڵاتەكەی بۆ ‏فراوانكردنی پەیوەندییەكان و هاریكاریی هاوبەشی نێوان هەردوولا لە هەموو ‏بوارەكاندا دەربڕی. هەروەها سوپاسی نێچیرڤان بازرانی كرد لە ‏برەودان بە پەیوەندییەكانی عێراق و هەرێمی كوردستان لەگەڵ توركیا.‏
لە تەوەرێكی دیكەی كۆبوونەوەكەدا بە بایەخەوە باس لە پرسی هەناردەكردنەوەی ‏نەوتی هەرێمی كوردستان لە ڕێگەی بەندەری جەیهانی توركییەوە كرا و ‏لەمبارەیەوە بیروڕایان گۆڕییەوە، هەروەها دۆخی ناوچەكە بەگشتی و چەند پرسێكی ‏جێی بایەخی هەردوولا، خرانە بەر باس.‏