شاندیكی هه‌رێمی كوردستان ماوه‌ی چه‌ند رۆژه له به‌غدایه و له‌باره‌ی بودجه و مووچه و شایسته داراییه‌كانی هه‌رێمی كوردستان له‌گه‌ڵ به‌رپرسانی باڵای حكومە‌تی عێراق كۆبوونەوەیان ئەنجامداوە.
شانده‌كه دوێنێش له‌گه‌ڵ وه‌زیری دارایی و نه‌وت به به‌شداری كۆمپانیای سۆمۆ كۆببووه‌وه.
سه‌رله‌ئێواره‌ی ئه‌مرۆ دووشه‌ممه نوری مالیکی، سەرۆکی ھاوپەیمانی دەوڵەتی یاسا پێشوازی لە شاندی ھەرێمی کوردستان بەسەرۆکایەتی قوباد تاڵەبانی کردووە، لەکۆبوونەوەیەکدا ھەردوولا پێشھاتە سیاسی و ئەمنییەکانی عێراق و ناوچەکەیان تاوتوێکردووە.
دكتۆر عه‌لا مه‌كی سه‌ركرده‌ی سوننـه و ئه‌ندامی پارتی نیشتمانی عێراق به سه‌رۆكایه‌تیی ئه‌یاد عه‌لاوی به وشه‌ی ڕاگه‌یاندووه، ھه‌رێم و به‌غدا زۆر له‌یه‌ك نزیك بوون، حكوومه‌تی ھه‌رێمی كوردستان ھه‌موو ئاماده‌كارییه‌كی بۆ ڕێككه‌وتن له‌گه‌ڵ به‌غدا پێشان داوه، ئێسته كه‌شه‌كه‌ش بۆ دانوستان له‌باره، بۆیه ئه‌مجاره ھه‌رێم و به‌غدا ده‌گه‌نه رێككه‌وتن، چونكه ده‌زانن كێشه ھه‌بێت سه‌قامگیری دروست نابێت.
دكتۆر عه‌لا مه‌كی گوتی، ھه‌رچه‌نده من ئه‌مجاره گه‌شبینم كه ھه‌ردوو حكوومه‌ت ده‌گه‌نه رێككه‌وتن و كۆتایی به‌و كێشانه دێنن، به‌ڵام ئه‌گه‌ر رێككه‌وتن نه‌كرێت و كێشه‌كان به‌رده‌وام بن، سه‌قامگیریش له عێراق به‌دی نایه‌ت.
ئه‌وه‌شی گوت، ھه‌رێمی كوردستان ڕژده و ئاماده‌یی خۆی بۆ رێككه‌وتن له‌گه‌ڵ به‌غدا پێشان داوه و پێویسته حكوومه‌تی عێراقیش به‌ھه‌مانشێوه بێت و ھه‌ڵوێستی نه‌رێنی نه‌بێت، ئاماده بێت بۆ رێككه‌وتن و بیانوو نه‌گرێت، چونكه ناكرێ چیتر ئه‌و كێشانه به ھه‌ڵپه‌سێراوی بمێننه‌وه.
کۆمێنت (0)
تا ئێستا هیچ کۆمێنتێک نەکراوە.