پۆمپیۆ: 4ی تشرینی دووەم هاوردەکردن و کڕینی نەوتی ئێران قەدەغە دەکەین

رێگەگرتن لە دەستکەوتی دارایی ئێران کاری لە پێشینەمان دەبێت


وەزیری دەرەوەی ئەمریکا ڕایگەیاند پابەند دەبن بە پاراستنی هێڵەکانی گواستنەوەی نەوت لە گەرووی هۆرمۆز، و وتی کاری لەپێشینەمان ڕێگەگرتنە لەدەستخسرنی دارایی لەلایەن ئێرانەوە.

مایک پۆمپیۆ لەکۆنگرەیەکی ڕۆژنامەوانیدا ڕایگەیاند هێڵەکانی گواستنەوەی نەوت لە گەرووی هۆرمۆز دەپارێزین کە ماوەیەکە ئێران هەڕەشەی داخستنی دەکات، و گوتی لە 4ی تشرینی دووەم هاوردەکردن و کڕینی نەوتی ئێران قەدەغە دەکەین.

گوتیشی رێگەگرتن لە دەستکەوتی دارایی ئێران کاری لە پێشینەمان دەبێت و چاودێری ئەو وڵاتانە دەکەین کە بەڵێنیانداوە گەمارۆ بخەنەسەر ئێران، و وتی دۆخی ئابووری ئێران چاک نابێتەوە تا ئەو کاتەی دەگەڕێتەوە سەر هۆشی خۆی.

پۆمپیۆ ئێرانی تۆمەتبارکرد بە هەوڵی کردەوەی تیرۆریستی لە فەرەنسا و وتی هەفتەی رابردوو دوو ئێرانی لەسەر پلاندانان بۆ ئەنجامدانی کاری تیرۆریستی لە پاریس دەستگیرکران.