كۆمسیۆن راگەیەندراوێكی دەربارەی ژماردنەوەی دەنگەكانی كەركوك بڵاوكردەوە

پرۆسەكە بە ئامادەبوونی نوێنەری سەرجەم لایەنەكان بەرێوەچوو

ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عێراق راگەیەندراوێكی دەربارەی كۆتاییهاتنی ژماردنەوەی دەنگەكانی پارێزگای كەركوك بڵاوكردەوە و ئەوەیخستەڕوو كە پرۆسەكە بە ئامادەبوونی نوێنەری سەرجەم لایەنەكان بەرٍێوەچووە.

كۆمسیۆن لە راگەیەندراوەكەیدا ئەوە دەخاتەڕوو كە سەرباری ئاستەنگە زۆرەكانی بەردەم ژماردنەوەی بەشێكی دەنگەكان، بەڵام خەڵكی كەركوك و بەتایبەتیش ئەو كارمەندانەی بەشدارییان لە جیاكردنەوەو ژماردنەوەی دەنگەكاندا كردووە، هەستێكی زۆر نیشتمانیان پیشاندا و دەكرێت بكرێنە نمونەی یەكڕیزی نیشتمانیی.

راشیگەیاند كە نوێنەری هیچ قەوارەیەكی سیاسیی دەستی لەكاروبارەكانی كۆمسیۆن وەرنەداوەو كارەكە بە بێلایەنییەكی تەواو و بە سەرپەرشتی نوێنەری نەتەوە یەكگرتووەكان بەڕێوەچووە.