لە مانگی ڕابردوودا پێنج کۆڵبەر گیانیان لەدەستداوە

بە تەقەی ڕاستەوخۆی هێزە ئەمنییەکانی ئێران


لە مانگی رابردووی ئەمساڵ ڕێژەی ئەو کۆڵبەرانەی لە سنوورەکانی ڕۆژهەڵاتی کوردستان بوونەتە قوربانی، بە بەراورد لەگەڵ مانگی پێشووتر، 137٪ زیادی کردووە.

بەپێی ڕاپۆرتێکی ناوەندی ئاماری هەنگاو لە مانگی ئایاری ڕابردوودا و لەسەر سنورەکانی نێوان باشور و ڕۆژهەڵاتی کوردستان، چوار کۆڵبەر بە تەقەی ڕاستەوخۆی هێزە ئەمنییەکانی ئێران کوژراون و کۆڵبەرێکیش بەهۆی کەوتنەخوارەوە لە بەرزایی گیانی لەدەستداوە.

هەر بەپێی ئەو ئامارە، نۆ کۆڵبەر بە تەقەی هێزە ئەمنییەکانی ئێران و  سێ کۆڵبەر بە هۆی کەوتنەخوارەوە لە بەرزایی و دوو کۆڵبەریش بەهۆی تەقینەوەی مینەوە بریندار بوون.

ئەو ژمارەیەش بەراورد بە مانگی پێشووتر لەسەدا 137 بەرزبووەتەوە، بەو پێیەی لە مانگی نیسانی ڕابردوودا کۆڵبەرێک کوژراوە و حەوتی دیکەش بریندار بوون.

ئەوەش لە کاتێکدایە لە چەند ساڵی ڕابردوودا بە دەیان کۆڵبەری کورد لە ڕێگا سەخت و پڕمەترسیدارەکانی سنورەکانی نێوان باشور و ڕۆژهەڵاتی کوردستان کوژراون و بریندار بوون.