ئێران.. كه‌س ناتوانێت له‌ سه‌رووی پێنج هه‌زار یۆرۆ بباته‌ ده‌ره‌وه

هەموو ئامانجێکی ئێران ئەوەیە رێگری لە زیاتر دابەزینی تمەن بکات

حکوومەتی ئێران رێوشوێنی توندی بۆ ئەوە داناوە خەڵک چ بڕە پارەیەک بە دۆلار یان بە یۆرۆ لەگەڵ خۆیان ببەنە دەرەوە کاتێک بۆ خوێندن و گەشت یان هەر هۆکارێکی دیكه‌ گەشتی دەرەوە دەکەن . 

بە گوێرەی ئەو رێوشوێنانە لە سنووری ئاسمان و وشکایی بڕێکی دیاریکراو دەستنیشان کراوە و بەراورد بە بڕەکانی پێشوو بۆ نیوە کەمی کردۆتەوە، هەر هاووڵاتییەک لەرێگەی فڕۆکەوە گەشتی دەرەوە بکات، ئەوا بۆی نییە لە پێنج هەزار یۆرۆ زیاتر هەڵبگرێت . 

بەگویرەی رادیۆ فەردا: هاوکات ئەگەر کەسەکە بە شەمەندەفەر یان ئۆتۆمبێل بچێتە دەرەوە، ئەوا بۆی نییە لە دوو هەزار یۆرۆ زیاتر لەگەڵ خۆیدا هەڵبگرێت . 

نرخی تمەنی ئێرانی بەرێژەیەکی بەرچاو دابەزیوە و ماوەی رابردووش حکوومەتی تاران ناچار بوو یەک نرخی دیاریکراو بۆ دۆلار دابنێت کە بریتییە لە چوار هەزار و 200 تمەن بۆ هەر دۆلارێک، لە کاتێکدا لە بازاڕی ئازاد نرخی دۆلار بۆ سەرووی حەوت هەزار تمەن بەرزبۆتەوە . 

هەموو ئامانجێکی ئێران ئەوەیە رێگری لە زیاتر دابەزینی تمەن بکات و رێگە نەدات خەڵک بە ئاسانی ئاڵوگۆڕی دراو بکەن و حەز دەکات هەر بە تمەن درێژە بە جووڵە بازرگانییەکان بدات . 

ئێران بردنەوە دەرەوەی زیاتر لەو بڕە پارە دیاریکراوە بە سپیکردنەوەی پارە هەژمار دەکات .