سبه‌ی پاره‌ی جووتیارانی هه‌ولێر دابه‌ش ده‌كرێت

كه‌ بڕی 41 ملیار دیناره‌

به‌ڕێوەبه‌ری گشتیی بازرگانیی هه‌رێمی كوردستان گوتی، بڕیاره‌ سبه‌ی ده‌ست به ‌دابه‌شكردنی پاره‌ی جووتیارانی هه‌ولێر بكرێت، كه‌ بڕی 41 ملیار دیناره‌ .

حكوومه‌تی عێراق تاوه‌كو ئێستا پاره‌ی ساڵه‌كانی 2014 و 2015 و 2016 و 2017ی جووتیارانی هه‌رێمی كوردستانی به ‌ته‌واوی خه‌رج نه‌كردووه‌، كه‌ زیاتر له‌600 ملیار دینار ده‌بێت و ‌ئێستا بڕیاری داوه‌ به‌ نیوه‌قیمه‌ت ئه‌و گه‌نمه‌ی جووتیاران حیساب بكات.

نه‌وزاد ئه‌دهه‌م، به‌ڕێوەبه‌ری گشتیی بازرگانیی هه‌رێمی كوردستان، ڕايگه‌یاند: "بڕیاره‌ سبه‌ی پاره‌ی جووتیارانی هه‌رێمی كوردستان كه‌ بڕی 42 ملیار دیناره،‌ دابه‌ش بكرێت، چونكه‌ له‌ ماوه‌ی ڕابردوودا پاره‌ی جووتیارانی دهۆك و سلێمانی دابه‌ش كراوه‌، كه‌ 11 ملیاری هی ساڵی ڕابردووه‌ و 30 ملیار دیناریشی هی ساڵی 2016یه‌، كه‌ ئه‌مه‌ش 12%ی پاره‌ی جووتیارانه‌ ده‌درێت و ئه‌وه‌ی دیكەیشی لای حكوومه‌تی عێراق ماوه‌."

نه‌وزاد ئه‌دهه‌م گوتیشی: "حكوومه‌تی عێراق بۆ ئه‌و پاره‌ی ماوه‌ هه‌ر تۆ‌نێك گه‌نمی به ‌348 هه‌زار و750 دیناری حیساب كردووه‌، كه‌ ده‌كاته‌ نیوه‌قیمه‌ت، ئێمه‌ش به ‌نووسراوی فه‌رمی حكوومه‌تی عێراقمان له‌وه‌ ئاگادار كردووەته‌وه‌ و دوێنێ وه‌زیری پلاندانان خۆی قسه‌ی له‌گه‌ڵیان كرد، ئه‌وانیش باس له‌وه‌ ده‌كه‌ن له‌سه‌ر داوای سه‌رۆكوه‌زیرانی عێراق پاره‌كه‌یان كه‌م كردووەته‌وه‌، كه‌ زیاتر له‌600 ملیار دیناری جووتیارانه و‌ هی چوار ساڵی ڕابردووە."