نه‌تانیاهۆ بۆ ئه‌ردۆغان: تۆ درۆى نیسان ده‌كه‌ى

ئه‌ردۆغان بۆ ناتانیاهۆ: تۆ ده‌وڵه‌تى تیرۆرى

دواى ئه‌وه‌ى رۆژى هه‌ینى 16 فه‌له‌ستینى له‌لایه‌ن هێزه‌كانى ئیسرائیله‌وه‌ كوژران، ره‌جه‌ب ته‌یب ئه‌ردۆغان سه‌رۆكى توركیاش ره‌خنه‌ى توندى له‌ سوپاى ئیسرائیل گرت و ئه‌مه‌ش نه‌تانیاهۆى سه‌رۆك وه‌زیرانی ئیسرائیلى نیگه‌ران كرد.

بنیامین نه‌تانیاهۆ سه‌رۆك وه‌زیرانی ئیسرائیل ئه‌مڕۆ یه‌كشه‌ممه‌ له‌ تویتێكدا هێرشێكى توندى كرده‌ سه‌ر ئه‌ردۆغان و گوتى، "سوپاى ئیسرائیل به‌ ره‌وشترین سوپایه‌ له‌ جیهان، پێویست ناكات وانه‌ له‌ پیاوێك (ئه‌ردۆغان) وه‌ربگرێت كه‌ چه‌ندان ساڵه‌ هاووڵاتییانى سڤیل (گه‌لى كورد) به‌ هه‌ره‌مه‌كى ده‌كوژێت".

ناتانیاهۆ له‌ تویته‌كه‌ى خۆى له‌باره‌ى ره‌خنه‌گرتنى ئه‌ردۆغان له‌ ئیسرائیل نووسیویه‌تى، "له‌وه‌ ده‌چێ ئه‌وان درۆى نیسان بكه‌ن".

له‌ لایه‌كى تره‌وه‌ جارێكى تر هه‌ر ئه‌مرۆ یه‌كشه‌ممه‌، ئه‌ردۆغان، له‌ وتارێكدا، كه‌ له‌ ویلایه‌تى ئه‌ده‌نه‌ ئاراسته‌ى لایه‌نگرانى پارتى داد و گه‌شه‌پێدانى ئیسلامى توركیاى كرد، روویكرده‌ ناتانیاهۆ و پێ گوت" تۆ زۆر لاوازى، ئێمه‌ قه‌ڵاچۆى تیرۆریستان ده‌كه‌ین، به‌ڵام بۆ تۆ بایه‌خى نییه‌، چونكه‌ تۆ ده‌وڵه‌تى تیرۆرى.

هه‌روه‌ها گوتى: "له‌م جیهانه‌دا، هیچ كه‌سێك تۆى به‌ راستگۆیى خۆش ناوێت. كاردانه‌وه‌ى كۆمه‌ڵگه‌ى نێوده‌وڵه‌تیش له‌ باره‌ى بڕیاره‌كه‌ى قودسه‌وه‌ له‌ نه‌ته‌وه‌یه‌كگرتووه‌كان به‌ڵگه‌یه‌كى روون و ئاشكرایه‌. به‌ هۆى ئه‌وه‌ى چه‌كى ناووكیت هه‌یه‌، سه‌ره‌ڕۆ و خۆت به‌زل مه‌زانه‌. كاتێك پێویستیت پێى ده‌بێت، ئه‌و چه‌كه‌ت ئیش ناكات.