له‌ داهاتوویه‌كی نزیكدا تره‌مپ و سه‌رۆكی كۆریای باكوور كۆده‌بنه‌وه‌

لە مانگی پێنجی ئه‌مساڵدا دۆناڵد ترەمپ و کیم جۆنگ ئوون کۆدەبنەوە


چۆنگ ئوی یۆنگ سەرۆکی ئۆفیسی ئاسایشی نیشتیمانی کۆریای باشوور ڕایگەیاند: بڕیاره‌ سەرۆکی ئەمەریکا لە مانگی پێنجی ئه‌مساڵدا لەگەڵ کیم جۆنگ ئون سه‌رۆكی کۆریای باکوور کۆبێتەوە. 

هاوكات کیم جۆنگ ئون سه‌رۆكی كۆریای باكوور بەڵێنیداوە، له‌ قۆناغی یه‌كه‌مدا پرۆگرامی موشه‌كی و ناوه‌كی وڵاته‌كه‌ی هه‌ڵپه‌سێرێت و له‌ قۆناغی دووه‌مدا  كۆتایی به‌ كاركردن بینێت هه‌ر دوو سێكته‌ره‌كانی پرۆگرامی‌ موشه‌كی و ناوه‌كی وڵاته‌كه‌ی .

چۆنگ ئوی یۆنگ سەرۆکی ئۆفیسی ئاسایشی نیشتیمانی کۆریای باشوور لە دەرەوەی کۆشکی سپی و بۆ ده‌زگاكانی راگه‌یاندن ئەم لێدوانەی دا رایگه‌یاند: دۆناڵد تره‌مپ سه‌رۆككۆماری ئه‌مریكا نه‌رمی نواندوه‌ و  له‌گه‌ڵ ئه‌وه‌دایه‌ كه‌ چاوی به‌ سه‌رۆكی كۆریای باكوور بکەوێت. 

ئەم هه‌وڵه‌ دوای ئه‌و داوایه‌ی ئەوەی کیم جۆنگ ئون سه‌رۆكی کۆریای باکوور دێت كه‌ بە فەڕمی و لە نامەیەکدا، پێشنیازی کۆبوونەوەیەکی له‌گه‌ڵ دۆناڵد ترامپ سەرۆکی ئەمەریکا کردووە كه‌ لەڕێی چۆنگ ئوی یۆنگ سەرۆکی ئۆفیسی ئاسایشی نیشتیمانی کۆریای باشوور نامەکەی پێگەیاندووە. 

چۆنگ وتیشی: مەشقە هاوبەشەکانی نێوان ئەمەریکا و کۆریای باشوور لە مانگی چواردا ئەنجام دەدرێن و سه‌رۆكی كۆریای باكووریش ده‌ڵێت: تێگه‌یشتی ئه‌رێنی هه‌یه‌ بۆ پێویست بوونی ئه‌و جۆره‌ مه‌شقه‌ سه‌ربازیانه. 

هەروەها لە ڕاگەندراوێکی کۆشکی سپیدا و سەبارەت به‌و بابەته،‌ سارا ساندێرز گوتەبێژی کۆشکی سپی رایگه‌یاند: وڵامه‌كه‌ی دۆناڵد ترامپ سەرۆکی ئەمەریکا بۆ‌ داوایه‌كه‌‌ی کیم جۆنگ ئون سەرۆکی کۆریای باکوور كه‌ مه‌به‌ست لێی ئەنجامدانی گفتوگۆیه‌ ‌ئه‌رێنیه‌.