عەبادی چەکی قورس لە حەشدی شەعبی وه‌رده‌گرێته‌وه‌

بۆ شەڕی داعش پێیانی دابوو


ئاژانسی هەواڵی ڕۆیتەرز بە پشت بەستن بە ژمارەیەك سەرچاوەی سەربازی و هەواڵگری بڵاویكردۆتەوە، سەرۆك وەزیرانی عێراق پلانی هەیە چەكی قورس لە هێزەكانی حەشدی شەعبی وەربگرێتەوە.

بەپێی ئەو هەواڵە، سوپای عێراق لە ئێستادا لیستی چەك و زرێپۆش و تانكەكانی حەشدی شەعبی وەرگرتووە كە پێشتر حكومەت بۆ شەڕی داعش پێیانی بەخشیبوو.

ئەوەش خراوەتەڕوو، لە قۆناغی دووەمیشدا بە پاساوی پاككردنەوەی چەكەكان سوپا و پۆلیسی عێراق چەكە قورسەكان لە حەشدی شەعبی وەردەگرنەوە.

هاوكات وەزارەتی بەرگری عێراقیش ئەو چەكدارانەی حەشدی شەعبی لە ڕیزەكانیان دووردەخاتەوە كە تەمەنیان زۆرە یاخود لە ڕووی جەستەییەوە گونجاون نین بۆ شەڕكردن.