مه‌زنترین ئینسكلۆپیدیا د دیرۆكێ دهۆكێ دا دێ كه‌ڤیته‌ به‌ر ده‌ستێ خوانده‌ڤانان

120 ڤه‌كۆله‌ران د ڤی ئینسكلۆپیدیایێ دا پشكداری كریه‌

نێزیكی پێنچ سالانه‌ نڤیسه‌رێن دهۆكێ ب هه‌ڤكاریا پارێزگه‌ها دهۆكێ و رێڤه‌به‌ریا گشتیا ره‌وشه‌نبیری و هونه‌ری ل پارێزگه‌ها دهۆكێ، مژوولی چێكرنا مه‌زنترین ئینسكلۆپیدیا د دیرۆكا دهۆكێ دا و نها ژ دیزاینێ ب دووماهی هاتیه‌ و ره‌نگه‌ ل سالا نوی بكه‌ڤیته‌ به‌رده‌ستێ خوانده‌ڤانان.

موسه‌دق تۆڤی، سه‌رپه‌رشتێ ئینسكلۆپیدیا دهۆكێ، به‌ باسنیوزی راگه‌یاند: ئه‌ڤ ئینسكلۆپیدیا دهۆكێ نه‌ه‌ به‌رگان بخۆڤه‌ دگریت و 5 هزار به‌رپه‌ره‌، دێ به‌رگه‌كێ ستویر ب خه‌ته‌كێ دبێژنێ زێرین د بۆكسه‌كێ دا هێته‌ چاپكرن، نێزیكی 120 ڤه‌كۆله‌ر و وه‌رگێران پشكداری د چێكرنا ڤه‌كۆلینێن ئینسكلۆپیدیا دهۆكێ دا كریه‌.

سه‌رپه‌رشتێ ئینسكلۆپیدیا دهۆكێ، دیار كر: "ئینسكلۆپیدیا دھۆكێ نھا ژ دیزاینێ ب دووماهی هاتیه‌ و بۆ چاپێ چوویه‌ و ره‌نگه‌ ل سالا نوی بكه‌ڤیته‌ به‌رده‌ستێ خوانده‌ڤانان".

تۆڤی ل دور مژارێن ئینسكلۆپیدیا دھۆكێ ئاشكرا كر، مژارێن جیولوجی، جوگرافی، شوینوار و جھێن شوینواری، دیرۆك ب ھه‌ر چوار قوناغێن دیرۆكی ڤه‌ دیرۆكا كه‌ڤن، دیرۆكا ئسیلامی دیرۆكا نوو و دیرۆكا ھه‌ڤچه‌رخ، ئه‌ده‌بیات، فولكلور، ھۆنه‌ر ب ھه‌موو شێوه‌یێن خوه‌ڤه‌، په‌روه‌رده‌ و فێركرن د ھه‌موو قۆناغان دا، دیرۆكا راگه‌ھاندن و رۆژنه‌مه‌ڤانی، بیبلوگرافیا په‌رتووكێن ده‌ڤه‌رێ، ئه‌و ژێده‌رێن ل سه‌ر ده‌ڤه‌رێ ھاتینه‌ نڤێسین، شێوازی ئاڤاكرنێ ل به‌ھدینان، مێژووا باژیر و گوندێن ده‌ڤه‌رێ، پێكھاتێن كارگێری، ئایینی نه‌ته‌وه‌یی و مه‌زھه‌بی. كورت و كرمانجی ھه‌ر مژاره‌كا په‌یوه‌ندی ب پارێزگه‌ھا دھۆكی ڤه‌ ھه‌ی ب قه‌زا و ناحیه‌ و گوندین وی ڤه‌د ئینسكلۆپیدیایێ دا جھێ خوه‌ گرتیه‌.

سه‌رپه‌رشتێ ئینسكلۆپیدیا دھۆكێ، ئه‌و یه‌ك ژی دیار كر، ب تنێ ئه‌م دو كه‌س بووین مژویلی كاری و نڤیسكاری و سه‌رپه‌رشتی و ھه‌تا كارێن ئیداری ئه‌ز و سه‌یدا خالد سالح بووین، نێزیكی پێنج سالان مه‌ كار تێدا كریه‌، نھا دیزاین ب دروستی ته‌مام بوویه‌، د ڤان دو سێ رۆژاندا دێ چیته‌ چاپێ و دبیت د ده‌مه‌كێ نه‌ دوور دا بھێته‌ چاپكرن و بگه‌ھیته‌ خوانده‌ڤانان.

سه‌رچاوه‌/ باس نیوز

كوردستان تیڤی/ كامه‌ران حاجی