سەرۆکی نوێی زیمبابۆی کابینەی نوێی حکومەتی راگەیاند

ئەندامانی کابینەکە سوێندی یاساییان خوارد

دوای کودەتا سەربازییەکەی زیمبابۆی و ناچارکردنی رۆبێرت مۆگابی، سەرۆکی پێشووی ئەو وڵاتە بە دەستلەکارکێشانەوەى، ئه‌مرۆ سەرۆکی نوێی زیمبابۆی کابینەی نوێی حکومەتی راگەیاند.

رۆژی دووشەممە 4-12-2017 ئیمێرسن مانگاگاو، سەرۆکی نوێی زیمبابۆی حکومەتی نوێی وڵاتەکەی راگەیاند، لە رێوڕەسمێکدا لە هاراری پایتەخت ئەندامانی کابینەکە سوێندی یاساییان خوارد.

کابینەکە لە ژمارەیەک بەرپرسی حیزبی فەرمانڕەوا و فەرماندە سەربازییەکانی زیمبابۆی، کە لە کودەتاکە بەشداربوون، پێکهاتووە. 

تێزانین پێکهێنانی حکومەتی نوێ لە زیمبابۆی لەکاتێکدایە، مانگی رابردوو ژمارەیەک فەرماندەی سەربازی بە سەرۆکایەتی مانگاگاو کودەتایەکی سەربازی ئەنجامدرا و دوای هەفتەیەک بەسەر کودەتاکەدا مۆگابی ناچار كرا به‌ فه‌رمى واز له‌ ده‌سه‌لات بهێنێت.