حەسەن ئەحمەد مستەفا ...
پڕۆسەی سیاسیی عێراق لە ماوەی شەش هەفتەی ڕابردوودا، تاكوو بە سەردانە فەرمییەكەی سەرۆكی هەرێم ڕێزدار (بارزانی) بۆ كۆشكی سپی و پێشوازیی گەرمی (سەرۆك ئۆباما) و جێگرەكەی (جۆو بایدن) دەگات، بە قۆناغێكی گرنگ و پڕجموجۆڵی سیاسی و دیپلۆماسی گەییشتووە، هەرێمی كوردستان ڕووخسارێكی نوێی بەخشیوەتە كۆی پڕۆسەكە و پێوەندییە دیپلۆماسییەكانی ئەمەریكا و عێراق بە گشتی و هەرێمی كوردستان بە تایبەتی.

ئەوەی كە گرنگە ئاماژەی پێ بدەین، ئەم سەردانە فەرمییەی سەرۆكی هەرێمی كوردستانە بۆ كۆشكی سپی و دیدار و كۆبوونەوەی لەگەڵ (باراك ئۆباما) و (جۆو بایدن)ـی جێگری، كە ڕۆژی 25/1/2010 لە ئۆڤاڵ ئۆفیسی كۆشكی سپیدا ئەنجام درا، بە مەبەستی گفتوگۆكردن لەسەر پڕۆسەی سیاسیی عێراق و نزیكبوونەوەی وادەی هەڵبژاردنەكان كە لە 7ـی مانگی ئازاردا ئەنجام دەدرێت، هەروەها گفتوگۆكردن دەربارەی سەقامگیریی سیاسی و چارەكردنی كێشەكانی نێوان هەرێم و بەغدا.

لەم دیدارەدا، (بارزانی) سەبارەت بە كێشەكانی عێراق بە ڕوونی بە سەرۆكی ئەمەریكا و (بایدن)ـی ڕاگەیاند كە عێراقییەكان دەتوانن لە ڕێگەی بڕگە و ماددە دەستوورییەكانەوە بە چارەی گونجاو و ئارامیی سیاسی بگەن. هەروەها بەڕێزیان هەڵوێستی (بایدن)ـی لە چوارچێوەی گەشەپێدانی پێوەندییەكانی ویلایەتە یەكگرتووەكان و عێراق و هەرێمی كوردستان، بەرز نرخاند.

(بارزانی)، پێشوازی لە هاوكاریی ئەمەریكا كرد بە مەبەستی گەییشتن بە چارەی گونجاو بۆ پڕۆسەی سیاسیی عێراق و زاڵبوون بەسەر ناكۆكییە ناوخۆییەكاندا، كە ئەمەریكا لەو بوارەدا هاوكار بووە و ڕۆڵی گرنگی بینیوە.

سەرۆكی ئەمەریكایش، لە لایەن خۆیەوە دووپاتی كردەوە كە خاڵی هاوبەش و هاندەر ئەوەیە عێراقییەكان كار بۆ مسۆگەركردنی ئاساییش بكەن كە گەشەپێدانی ئابووری و سیاسی و ڕۆڵی هەرێمایەتییان بەرز دەكاتەوە.

هەر لە چوارچێوەی سەردانەكەی بەڕێز (سەرۆك بارزانی)ـیدا كە چەندین نێوەندی گرنگ لە خۆ دەگرێت، لەوانەیش لە پەیمانگەی برۆكلن پێشوازی دەكرێت و تێڕوانینە سیاسییەكانی دەخاتە ڕوو، پاشان چەندین وەزیر و سیاسەتكاری گرنگی ئیدارەی ئێستای ئەمەریكا و ئیدارەی پێشوو دەبینێت.

دەتوانین دۆخەكە بە شێوەیەك هەڵسەنگێنین كە ئەمەریكا دەیەوێت پێوەندییەكانی لەگەڵ هەرێمی كوردستانی عێراقی فیدڕاڵدا بباتە قۆناغێكی نوێوە كە ناو دەنرێت پێوەندیی (كوردی- ئەمەریكایی) لە چوارچێوەی عێراقی فیدڕاڵی دیموكراتیدا، لێكدانەوەیشمان بۆ ساغكردنەوەی ئەم ڕەوشە، لێدوانە فەرمییەكەی كۆشكی سپی و وەزارەتی دەرەوەی ئەمەریكایە لە كاتی تێپەڕاندنی یاسای هەڵبژاردنەكانی پەرلەمانی عێراق كە كوردیان دڵنیا كردەوە، هەروەها بڵاوكردنەوەی لێدوانێكی كۆشكی سپی بوو بە بۆنەی دیداری (بارزانی) و (ئۆباما)ـوە.

لێرەدا بە ئاشكرا سەنگی كورد و هەرێمی كوردستان لە هاوكێشە سیاسییەكانی عێراق و دەوڵەتانی دەوروبەر بە ڕوونی دەردەكەوێت، ڕوونتر دەبیندرێت كە هەرێمی كوردستان فاكتەری جێگیریی سیاسی و بەڕێوەچوونی سەركەوتووانەی پڕۆسەكانە لە عێراقدا، هەرچەندە كورد لەگەڵ عەرەبدا گیرۆدەی عەقڵییەتێكی شۆڤێنیی عەرەبی سوننەتییە.

بە هۆی ئەوەی كە عێراق بە تایبەتی و ناوچەكە بە گشتی بە قۆناغێكی ڕاگوزەری سەیردا دەرباز دەبێ، ئەم پێوەندییەی ئەمەریكا- كورد دەبێتە جێگەی دڵنیایی و سەرەتایەكی بەهێز بۆ قۆناغی دوای پاشەكشەی سەربازیی ئەمەریكا لە عێراق. دەروازەی پێوەندییەكانی كورد، وەبەرهێنانی ئەمەریكا و ڕۆژئاوایی و جیهانی زیاتر واڵا دەكات، ئەم لوتكە كوردی- ئەمەریكاییە، جەوهەرێكی گەورەیە و دەكرێت فۆڕمی چەندین دەستكەوتی سیاسی و مەدەنیی لێ بەرهەم بهێندرێت.