لەدرێژەی گەشتە فەرمیەكەیدا بۆ ئەورووپا بەڕێز مسعود بارزانی سەرۆكی كوردستان وتارێكی پێشكەشی كرد، كە ئەمەش دەقەی وتەكەی بەرێزیان: 

سەرۆكی كوردستان دووپاتیكردەوە كوردستان هەمیشە خوازیارە پەیوەندی باشی لەگەڵ توركیا هەبێت و ئەو قسانەی ڕەتكردەوە گوایە كوردستان ببێتە بەشێك لەتوركیاو گوتی: من نازانم كێ ئەو قسانەی كردووە، بەڵام ئەمە شتیكی واقیعی نییە، ئێمە پێمان خۆشە پەیوەندی باشی سیاسی و ئابووریمان لەگەڵ توركیادا هەبێت و ئێستاش هەمانە، بەڵام بڕوا ناكەم هیچ بەرپرسێك گوتبی كوردستان دەبێتە بەشێك لەتوركیا ئەگەر واشی گوتبێ ئەوە ڕای تایبەتی خۆیەتی. 

سەرۆكی كوردستان دەربارەی پەرەسەندنی سیاسی ئەم دواییەی توركیا ئاماژەی بەوەدا ئەوە شتێكی ئیجابیە ئەگەر چیش نەگەیشتۆتە ئاستی ڕاگرتنی پرۆسەی سەربازی، بەڵام بە بەراورد لەگەڵ ماوەی بەر لەئێستا بارودۆخ جیاوازەو گوتی: ئەو گۆڕانەی ئێستا لەتوركیا هەیە بەشتێكی ئیجابی دەزانین، ئەوەش دەزانین كە هێشتا نەگەیشتۆتە ئەو ئاستەی كە ئۆپەراسیۆنی سەربازی تەواو ببێت و مەسەلەكە چارەسەر بكرێت، بەڵام ئەگەر بەراوردی بكەین لەگەڵ پێش ئێستا، ئەو فەرهەنگەی كە ئەو هەموو ساڵە لەتوركیادا هەبووە هەروەها ئەو ئۆپۆزیسیۆنە بەهێزەی هێشتا هەیە بەرامبەر بەو هەنگاوانەی كە حكوومەتی توركیا هاویشتوویەتی، ئێمە پێمانوایە دەبێ هانی ئەو هەنگاوانە بدەین و هانیشیان دەدەین بۆ ئەوەی پرۆسەی ئاشتی بگاتە ئەنجام و دەبێ نەفەسێكی درێژ هەبێت، دەبێ بە هەموو لایەك هەوڵ بدەین ئەو پرۆسەیە سەربكەوێ. ئێمە پێمان خۆش نییە پرۆسەی سەربازی بەردەوام بێت، بەڵام ئەگەر پرۆسەی سیاسی و پرۆسەی ئاشتی سەركەوت واتا پرۆسەی سەربازی نامێنێت، ئەگەر پرۆسەی سەربازیش سەركەوت و بەردەوام بوو واتا پرۆسەی سیاسی نامێنێت بۆیە ئێمە پشتگیری لەپرۆسەی ئاشتی دەكەین. 
 
سەرۆكی كوردستان لەوەڵامی پرسیارێك دەربارەی پاڵپشتی سەركردایەتی سیاسی كوردستانی ئێراق بۆ پرۆسەی ئاشتی لەتوركیا گوتی: ئێستا ئەو پرۆسەیە بۆ ئەوەیە و كێشەیە چارەسەر بكرێ و پەكەكەش بگەڕێنەوە ماڵی خۆیان لەتوركیاو ببنە بەشێك لەپرۆسەی سیاسی. هەروەها ئاوارەكانی كەمپی مەخمووریش. بۆیە هەرچییەك كە پێویست بێت، ئێمە بتوانین یارمەتی هەموو لایەك بدەین كە ئەم پرۆسەیە سەربكەوێ، ئێمە بەردەوام دەبین و چ لەئێمە داوا بكرێ، ئێمە ئەوە دەكەین، بەڵام بەخۆمان چ دەكەین بە هەقیقەت ئەوە بۆ هەردوولا جێهێڵراوە، چ داوا لەئێمە بكرێ، ئێمە ئەوە دەكەین، بەڵام وەكو پرەنسیپ ئێمە پشتگیریەكی بەهێز لەو پرۆسەیەی ئاشتی دەكەین، ئومێدەوارین برایانی ئێمە لەكەمپی مەخموور بگەڕێنەوە جێگەو رێگەی خۆیان، هەروەها چەكدارانی پەكەكەش بگەڕێنەوە ناو كەسوكاری خۆیان و تەواوی پرۆسەی سیاسی لەتوركیا بگاتە ئاستێكی وا ئیتر شەڕەكە لەناو پەرلەمان بكرێ و پێویستی بە چەك و شەڕ نەمێنێ. 

هەروەها لەوەڵامی پرسیارێكی دیكە دەربارەی گەڕانەوەی پەكەكە، بەڕێزیان گوتی: هەر هەنگاوێك ببێتە مایەی چەسپاندنی ئەم پرۆسەیە ئێمە لاگیری لێدەكەین. پێموایە ئەو گرووپەی كە گەڕانەوەو بەو شێوەیەی كە پێشوازیان لێكرا پێویست نەبوو، چونكە هێشتا پرۆسەكە دەڵەمەیەو نەگەیشتۆتە ئاستێكی وا كە خۆی بگری، لەبەر ئەوەی ئەوەی نەدەهێنا. من پێموایە هەڵەیەك بوو بەم شێوەیە لەبەرژەوەندی كوردو لەبەرژەوەندی پرۆسەی ئاشتیش دانەبوو. ئێمە ئەو تێبینیەمان هەبوو، بەڵام نابێ ئەوە ببێتە هۆی ئەوەی كە ئەم پرۆسەیە بوەستێ.

چۆن دەگەڕێنەوە؟ ئێستا باس لەوەیە كە چۆن بگەڕێنەوە. ئەوەی ئێمە دەیبینین، ئێستا دەوڵەتی توركیا چارەسەری هۆیەكان دەكات، ئەو هۆیانەی وای كردووە ئەم گەنجانە چەك هەڵبگرن. كە ئەم هۆیانە چارەسەر كران، عەینی ئەو گرووپانە دەگەڕێنەوەو ئیتر پێویست بەوە نامێنێ چەك هەڵبگرن. وردەكاریەكەی بۆ خودی دەوڵەتی توركیاو ئەوان جێهێڵراوە، ئێمە ناچینە ناو ئەو وردەكاریانەوە. 

سەرۆكی كوردستان نیشانیدا زۆربەی داهاتی ئێراق لەنەوت و گازەوەیە و هەموو لایەك لەسەر دابەشكردنی ئەم داهاتە رێككەوتووە. 

سەرۆك بارزانی گوتی: ئێمە كۆكین لەسەر دابەشكردنی داهاتی وڵات كە زۆربەی داهاتەكە لەنەوت و غازەو هیچی دیكە نییە. نەوت و غازی موڵكی هەموو میللەتی ئێراقەو داهاتەكەشی بۆ هەموو خەڵكی ئێراقە بەشێوەیەكی یەكسان، ئێمە لەگەڵ ئەو پرەنسیپە داین.  سەرۆكی كوردستان دووپاتیكردەوە كورد داوای دابەشكردنی ئێراقی نەكردووەو ناشبێتە هۆكاری ئەو دابەشكردنەو گوتی: ئێمە وەكو كورد نە داوامان كردووەو نە دەشبینە هۆكاری ئەو دابەشكردنە، بەڵام ئەگەر برایانی شیعەو سوننە بڕیاریاندا ئەو كاتە دەبێتە بەرپرسیارێتی ئەوان. ئێمەش سەلماندمان ئێمە پابەندی ئەوەین و ئەمەش ماددەیەكی دەستوورییە.

 دەربارەی هەڵبژاردنی دادێ و پرسی كەركووك و هەڵوێستی كورد لەمبارەیەوە سەرۆكی كوردستان گوتی: ئێمە لەگەڵ هەموو حزبەكان دانیشتووین پێش ئێستا لەسەر ئەو بابەتە، بەهۆی ئەوەی هەڵبژاردن بە لیستی كراوە دەبێت دابەزین بەیەك لیست زەحمەتە، بەڵام هەموو لایەك پەیمانیان داوە هەتا ئەگەر لەپەرلەمانی كوردستاندا بۆچوونی جیاواز هەبێ كە زۆر ئاساییە گفتوگۆ و شەڕیش دەبێ، بەڵام لە دەرەوەی پەرلەمانی هەرێمی كوردستان و بەتایبەتی لەناو پەرلەمانی فیدراڵ هەموویان یەكهەڵوێست دەبن و هەموولایەك ئەو پەیمانەی داوە كە كورد یەكهەڵوێست و یەك دەنگ بن لە پەرلەمانی بەغدا.

سەرۆكی كوردستان گەشبینی خۆی بە ئاسۆی ڕووناكی پەیوەندی نێوان كوردستان و توركیا نیشانداو گوتی: ئێمە ئاسۆی پەیوەندیمان لەگەڵ توركیا زۆر رووناك دەبینین و پێموایە شتی هاوبەشمان زۆرە بەتایبەتی لە بواری ئابووری و بازرگانی، ئەو پرۆسەیەی ئاشتیش لە ئێستا توركیا دەستی داوەتێ یاریدەدەرێكی زۆر گەورە دەبێت بۆ پێشڤەچوونی پەیوەندیمان لەگەڵ توركیا، پێموایە ئەو دەرفەت و ئاسۆیەش لە نێوان ئێمە و توركیا هەیە بۆ ئەو پەیوەندییانە لە شوێنی دیكە نییە.

دەربارەی پرسی یاسای نەوت و گاز، سەرۆكی كوردستان ڕوونیكردەوە، یاساكە دوو بەشە، یاسای نەوت و گاز و یاسای داهات، گوتی: دەستووری ئێراق دەڵێ نەوت و گاز بۆ هەموو گەلی ئێراقەو داهاتیش بۆ هەموو گەلی ئێراقەو ئێمە هیچ ناكۆكییەكمان لەوبارەیەوە نییە، ئێستا تا سەرژمێریی مەركەزی دەكرێ ڕێككەوتن وایە تا ئەو ناوچانەی دابڕاون نەیەنەوە سەر هەرێمی كوردستان پشكی هەرێمی كوردستان %17یە. كە سەرژمێریی مەركەزی كرا قەبارەی هەر لایەنێك دیاردەكەوێت.

ئێمە لەگەڵ ئەوەین پشكی كوردستان ڕاستەوخۆ بچێتە سەر حیسابی هەرێمی كوردستان نەك لە ڕێگەی وەزارەتی نەوتی بەغداو وەزارەتی دارایی بەغدا، چونكە زۆرجار بودجەكە وەكو چەكێك دژی ئێمە بەكاردێنن، ئێمە لەسەر ئەم خاڵە دەربارەی یاسای دابەشكردنی داهات سوورین ئەمە هەڵوێستی ئێمەیەو مافی خۆشمانە. ئێمە دژی یاسای نەوت و گاز نین و سەلماندمان ئێمە پابەندی دەقی دەستوورین. ئێمە لە حوزەیرانی ڕابردوو توانیمان ڕۆژانە 100 هەزار بەرمیل لە كێڵگەی نەوتی زاخۆ بەرهەمی بهێنن و خستمانەسەر بۆڕی مەركەزی كە لەئێراقەوە دەچی بۆ توركیا و داهاتەكەی لەگەڵ هەموو نەوتی تری ئێراق تێكەڵ دەكرێ.

سیاسەتی وەزارەتی نەوتی ئێراق سیاسەتێكی فاشیل بوو، وەزارەت لە ئیدارەكردنی بواری نەوتیدا شكستی خوارد، بۆیە ئێمە زۆر پابەندی بڕیارەكانی وەزارەتی نەوتی ئێراق نین، چونكە فاشیل بوو خزمەتی گەلی ئێراقی نەكردو 8 ملیار دۆلار لە ماوەی 3 ساڵی ڕابردوو بۆ وەزارەتی نەوتی ئێراق تەرخانكرا نەیانتوانی یەك پاڵاوگەش دروستبكەن و بەرهەمی نەوتی ئێراقیش دابەزی لەجیاتی ئەوەی بەرز بێتەوە، جا ئێمە چۆن پابەندی بڕیارەكانی وەزارەتێكی وا فاشیل بین.

ئێستا ڕۆژانە 100 هەزار بەرمیل بەرهەم دەهێنرێ، بەڵام بەپێی قسەی شارەزایانی كەرتی نەوت لە كۆتایی 2011 دا لە یەك ملیۆن بەرمیل تێدەپەڕێ.  سەرۆكی كوردستان دووپاتیكردەوە پرسی كەركووك هۆكاری سەرەكی شەڕە یەك لە دوای یەكەكانی میللەتی كورد بووە لەگەڵ ڕژێمە یەك لە دوای یەكەكانی ئێراق، سەرۆكی كوردستان گوتی: ئێمە دەمانەوێ ئەو گرفتە بۆ نەوەكانی دیكە نەمێنێت و چارەسەری بكەین، دەستووری ئێراق %85 ی گەلانی ئێراق دەنگی بۆ داوەو ڕێگەچارەی چارەسەركردنی كێشەی كەركووكی داناوەو ئێمە بەو چارەسەرە ڕازین كە ئاساییكردنەوەو سەرژمێری و ڕیفراندۆمە، لەمە زیاتر چی؟ خەڵكی كەركووك خۆی بڕیار لە چارەنووسی خۆی دەدات نە ئێمەو نە حكوومەتی فیدڕاڵ و نەهیچی دیكە، خەڵكی كەركووك خۆی بڕیار دەدات جا با ئەو دەرفەتە بەوان بدرێ بەمشێوەیە ئەو بۆمبە تەوقیتكراوە هەڵدەوەشێندرێتەوەو هیچ كاریگەریشی نامێنێت ئەگەر نا بێگومان بۆمبی تەوقیتكراوەو لەوانەیە كاریگەریی خراپی هەبێت، ئێمە دەمانەوێ ئەو مەترسییە نەهێڵینەوە، بەداخەوە هێشتا تیرۆر كارایە بنبڕ نەبووەو مەترسیی ئەوەمان هەیە تا لە هەڵبژاردن نزیكتر ببین تیرۆر زیاتر ببێت.