بەهۆی رووداوە دڵتەزێنەكەی ئەمڕۆی رێگەی كەلار – كفری كە بەهۆیەوە چوار قوتابی كچ بەهۆی وەرگەڕانی پاسی گواستنەوەیەان گیانیان لەدەست دا و حەوت قوتابی تریش بریندار بوون، ماتەمینی لە سنووری ئیدارەی گەرمیان راگەیەنرا.
جەلال شێخ نووری سەرپەرشتیاری ئیدارەی گەرمیان رایگەیاند: ڕووداوە ناخ هەژێنەکەی ئەمڕۆ سێشەممە کە لەسەر ڕێگای کەلار – کفری ئۆتۆمبیلێکی خوێندکاران وەرگەڕا و بەهۆیەوە چوار کچە قوتابی بە ناوەکانی (دانیا ئەحمەد لەتیف، کەوسەر ئەحمەد لەتیف، شەم سامان و ئارەزوو سەردار) گیانیان سپارد و حەوت قوتابی تر برینداربوون، لەناخەوە دڵتەنگ و خەمباری کردین.
ڕاشیگەیاند: ئەم ڕووداوە نیگەرانی و خەمباری سەرجەم چین و توێژەکان و خەڵکی گەرمیان و کوردستانی بەدوای خۆیدا هێنا.
هەروەها رایگەیاند: ئەم ڕووداوە بۆ هەموو لایەک جێگەی داخ و پەژارەیەکی قووڵە، وەک هاوخەمییەک بۆ بنەماڵە و کەسوکاری قوربانییانی ئەو ڕووداوە ناخهەژێنە، بۆ ماوەی سێ ڕۆژ لە سنووری ئیدارەی گەرمیاندا ماتەمینی گشتی ڕادەگەیەنین.
کۆمێنت (0)
تا ئێستا هیچ کۆمێنتێک نەکراوە.